ପଶ୍ଚିମବଙ୍ଗ ରାଜ୍ୟସଭା ନିର୍ବାଚନ ପାଇଁ ଅନନ୍ତ ମହାରାଜଙ୍କୁ ପ୍ରାର୍ଥୀ ଭାବେ ଘୋଷଣା କଲା ବିଜେପି

ନୂଆଦିଲ୍ଲୀ: ପଶ୍ଚିମବଙ୍ଗରେ ହେବାକୁ ଥିବା ରାଜ୍ୟସଭା ନିର୍ବାଚନ ପାଇଁ ବିଜେପି ଆଜି ଏହାର ପ୍ରାର୍ଥୀ ଘୋଷଣା କରିଛି | ବିଜେପି ପଶ୍ଚିମବଙ୍ଗରୁ ଅନନ୍ତ ମହାରାଜଙ୍କୁ ରାଜ୍ୟସଭା ନିର୍ବାଚନ ପାଇଁ ପ୍ରାର୍ଥୀ କରିଛି। ଅନନ୍ତ ମହାରାଜ ଗ୍ରେଟର କୁଚବିହାର ଆନ୍ଦୋଳନର ମୁଖ୍ୟ ଥିବାବେଳେ ନିର୍ବାଚନ ଆୟୋଗଙ୍କ ପକ୍ଷରୁ ମିଳିଥିବା ସୂଚନା ମୁତାବକ ଜୁଲାଇ ୨୪ରେ ୧୦ଟି ରାଜ୍ୟସଭା ଆସନ ପାଇଁ ନିର୍ବାଚନ ହେବ। ଏଥିମଧ୍ୟରେ ପଶ୍ଚିମବଙ୍ଗରେ ୬ଟି, ଗୁଜୁରାଟରେ ୩ଟି ଏବଂ ଗୋଆରେ ଗୋଟିଏ ଆସନ ରହିଛି। ବର୍ତ୍ତମାନର ରାଜ୍ୟସଭା ସଦସ୍ୟଙ୍କ କାର୍ଯ୍ୟକାଳ ୧୮ ଅଗଷ୍ଟରେ ଶେଷ ହେବ। ଏଥିମଧ୍ୟରେ ଟିଏମସିର ଡେରେକ ଓ’ବ୍ରାୟନ୍, ଡୋଲା ସେନ୍, ସୁସ୍ମିତା ଦେବ, ସୁଖେନ୍ଦୁ ଶେଖର ରାୟ, ସାନ୍ତା ଛତ୍ରୀ ଏବଂ ପଶ୍ଚିମବଙ୍ଗର କଂଗ୍ରେସର ପ୍ରଦୀପ ଭଟ୍ଟାଚାର୍ଯ୍ୟ ଅଛନ୍ତି।
ପଶ୍ଚିମବଙ୍ଗର ୬ଟି ସିଟ୍ ମଧ୍ୟରୁ ଟିଏମସି ପାଞ୍ଚଟି ଏବଂ ଗୋଟିଏ ସିଟରେ ବିଜେପିର ବିଜୟ ସୁନିଶ୍ଚିତ ବୋଲି କୁହାଯାଉଛି । ଯଦି ଅନନ୍ତ ମହାରାଜ ଜିତନ୍ତି ତେବେ ଏହା ପ୍ରଥମ ଥର ହେବ ପଶ୍ଚିମବଙ୍ଗରୁ ରାଜ୍ୟସଭା ସଦସ୍ୟ ଭାବରେ ଜଣେ ବିଜେପି ନେତା ନିର୍ବାଚିତ ହେବେ। ଅନନ୍ତ ରାୟ ମହାରାଜ ଜଣେ ପ୍ରଭାବଶାଳୀ ବିଜେପି ନେତା ହୋଇଥିବାବେଳେ ପଶ୍ଚିମବଙ୍ଗର କୁଚବିହାର, ଦିନାଜପୁର ଏବଂ ଜଲପାଇଗୁଡ଼ି ଜିଲ୍ଲାରେ ତାଙ୍କର ବିଶେଷ ପ୍ରଭାବ ରହିଛି | ଅନନ୍ତ ମହାରାଜ ମଧ୍ୟ ଗ୍ରେଟର କୁଚ ବିହାର ପିପୁଲ୍ସ ଆସୋସିଏସନର ସଭାପତି ଥିବାବେଳେ ଗତକାଲି ଟିଏମସି ଏହାର ପ୍ରାର୍ଥୀଙ୍କ ନାମ ଘୋଷଣା କରିଥିଲା | ଟିଏମସି ଦଳର ମୁଖପାତ୍ର ଡେରେକ ଓ’ବ୍ରାୟନ୍, ଡୋଲା ସେନ୍, ସୁଖେନ୍ଦୁ ଶେଖର ରାୟ, ସମୀରଲ ଇସଲାମ, ପ୍ରକାଶ ଚିକ୍ ବଡାଇକ୍ ଏବଂ ସାକେତ ଗୋଖଲେଙ୍କ ନାମ ପ୍ରାର୍ଥୀ ଭାବେ ଘୋଷଣା କରିଥିଲା |