କେନ୍ଦ୍ରାପଡା: ଥାଇଲାଣ୍ଡରେ ଫସିଲେ ୪ ଓଡ଼ିଆ ଶ୍ରମିକ। ଏହି ପ୍ରବାସୀ ଶ୍ରମିକ ମାନେ ଏକ ଭିଡିଓ ବାର୍ତ୍ତା ଜାରି କରି ସେମାନଙ୍କୁ ଉଦ୍ଧାର ପାଇଁ ଓଡିଶା ସରକାର ଏବଂ ସ୍ଥାନୀୟ ସାଂସଦଙ୍କୁ ନିବେଦନ କରିଛନ୍ତି। କେନ୍ଦ୍ରାପଡା ଜିଲ୍ଲାର ରାଜନଗର ଏବଂ ଆଳି ଅଞ୍ଚଳର ଏହି ପ୍ରବାସୀ ଶ୍ରମିକଙ୍କୁ ପ୍ରାୟ ଏକ ବର୍ଷ ପୂର୍ବେ ଏକ ପ୍ଲାଏଉଡ୍ ନିର୍ମାଣକାରୀ କମ୍ପାନୀରେ କାମ ସୁଯୋଗ ଦେବା ବାହାନାରେ ପର୍ଯ୍ୟଟନ ଭିସାରେ ଥାଇଲ୍ୟାଣ୍ଡ ନିଆଯାଇଥିଲା କିନ୍ତୁ ସେବେଠାରୁ ସେମାନେ ଶୋଷଣର ଚକ୍ରରେ ଫସି ରହିଛନ୍ତି। ସେମାନେ ଅଭିଯୋଗ କରିଛନ୍ତି ଯେ ସେମାନଙ୍କୁ ସେମାନଙ୍କ ଇଚ୍ଛା ବିରୁଦ୍ଧରେ ରଖାଯାଇ ବିନା ମଜୁରୀରେ କାମ କରାଉଛନ୍ତି। ଏପରିକି ମାନସିକ ଏବଂ ଶାରୀରିକ ନିର୍ଯାତନା ଦିଆଯାଉଛି।
ଏହି ଶ୍ରମିକମାନେ ଗୋବଙ୍ଗା ଗ୍ରାମର ଖିରୋଦ ଦାସ, ପୋଇଝରିଆ ଗ୍ରାମର ମନୋଜ ମଲ୍ଲିକ, ରାଜକନିକା ବ୍ଲକ ଅନ୍ତର୍ଗତ ନାହୁଣୀ ଗ୍ରାମର କୈଳାସ ସେଠୀ ଏବଂ ଆଳି ବ୍ଲକ ଅନ୍ତର୍ଗତ ପଦନିପାଳ ଗ୍ରାମର ନିତ୍ୟାନନ୍ଦ ମଲ୍ଲିକ ଭାବରେ ଚିହ୍ନଟ ହୋଇଛନ୍ତି। ଉତ୍ତର ପ୍ରଦେଶର ଗୋରଖପୁର ଅଞ୍ଚଳର ରାଜ କୁମାର ପାସି ନାମକ ଆଉ ଜଣେ ଶ୍ରମିକ ମଧ୍ୟ ସମାନ ଅସୁବିଧାର ସମ୍ମୁଖୀନ ହେଉଥିବା ଜଣାପଡ଼ିଛି।