ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦୁଇ ପୁଅ ଏରିକ୍ ଟ୍ରମ୍ପ ଓ ଡୋନାଲ୍ଡ ଟ୍ରମ୍ପ ଜୁନିଅରଙ୍କ ସହାୟତାରେ ଫ୍ଲୋରିଡା ଭିତ୍ତିକ ଡ୍ରୋନ୍ ଷ୍ଟାର୍ଟଅପ୍ ”ପାୱାରସ୍” ବର୍ତ୍ତମାନ ପଶ୍ଚିମ ଏସିଆରେ ଚାଲିଥିବା ଘମାଘୋଟ ଯୁଦ୍ଧ ପରିସ୍ଥିତି ମଧ୍ୟରେ ଉପସାଗରୀୟ ଦେଶଗୁଡ଼ିକୁ ନିଜର ପ୍ରତିରକ୍ଷା ପ୍ରଯୁକ୍ତିବିଦ୍ୟା ବିକ୍ରି କରିବା ପାଇଁ ପ୍ରୟାସ ଆରମ୍ଭ କରିଥିବାବେଳେ ଏହାକୁ ନେଇ ପ୍ରବଳ ରାଜନୈତିକ ବିବାଦ ସୃଷ୍ଟି ହୋଇଛି। ଗତ ଫେବୃଆରୀ ୨୮ ତାରିଖରେ ହୋଇଥିବା ସମନ୍ୱିତ ଆକ୍ରମଣ ପରେ ଇରାନର ବିପଦକୁ ସାମ୍ନା କରୁଥିବା ଆରବ ଦେଶଗୁଡ଼ିକୁ କମ୍ପାନୀ ନିଜର ଇଣ୍ଟରସେପ୍ଟର ସିଷ୍ଟମ ପ୍ରଦର୍ଶନ କରୁଛି, ଯାହାକୁ ନେଇ ପୂର୍ବତନ ସରକାରୀ ଅଧିକାରୀ ରିଚାର୍ଡ ପେଣ୍ଟର କଠୋର ସମାଲୋଚନା କରି କହିଛନ୍ତି ଯେ ରାଷ୍ଟ୍ରପତିଙ୍କ ପରିବାର ଯୁଦ୍ଧରୁ ଅର୍ଥ ରୋଜଗାର କରିବା ପାଇଁ ଏହି ବ୍ୟବସାୟିକ ସୁଯୋଗକୁ ବ୍ୟବହାର କରୁଛନ୍ତି ଏବଂ ଏହି ଦେଶଗୁଡ଼ିକ ଉପରେ ଏକ ପ୍ରକାର ଚାପ ସୃଷ୍ଟି ହେଉଛି। ଅନ୍ୟପଟେ କମ୍ପାନିର ସହ-ପ୍ରତିଷ୍ଠାତା ବ୍ରେଟ୍ ଭେଲିକୋଭିଚ୍ ଏହାକୁ ଏକ ଗୁରୁତ୍ୱପୂର୍ଣ୍ଣ ଆମେରିକୀୟ ଶିଳ୍ପର ବିକାଶ ଭାବରେ ଦର୍ଶାଇ କହିଛନ୍ତି ଯେ ବିଶ୍ୱସ୍ତରୀୟ ଅସ୍ତ୍ରଶସ୍ତ୍ର ପ୍ରତିଯୋଗିତାରେ ଆଗରେ ରହିବା ଏବଂ ଜୀବନ ରକ୍ଷା କରିବା ପାଇଁ ଏହି ଉନ୍ନତ ପ୍ରଯୁକ୍ତିବିଦ୍ୟା ଅତ୍ୟନ୍ତ ଆବଶ୍ୟକ।
ଯେତେବେଳେ ପଶ୍ଚିମ ଏସିଆରେ ଇରାନ ଏବଂ ଇସ୍ରାଏଲ ମଧ୍ୟରେ ସାମରିକ ସଂଘର୍ଷ ଚରମ ସୀମାରେ ପହଞ୍ଚିଛି, ସେତେବେଳେ ରାଷ୍ଟ୍ରପତିଙ୍କ ପରିବାରର ଏହି ନିବେଶକୁ ନେଇ ନୈତିକତା ପ୍ରଶ୍ନବାଚୀ ସୃଷ୍ଟି ହୋଇଛି। ଏରିକ୍ ଟ୍ରମ୍ପ ଏହି ନିବେଶକୁ ନେଇ ନିଜକୁ ଗର୍ବିତ ବୋଲି କହିଥିବାବେଳେ ସମାଲୋଚକମାନେ ଏହାକୁ କ୍ଷମତାର ଅପବ୍ୟବହାର ଓ କଂଗ୍ରେସର ବିନା ସମ୍ମତିରେ ଚାଲିଥିବା ଯୁଦ୍ଧରୁ ଫାଇଦା ଉଠାଇବା ବୋଲି କହିଛନ୍ତି। ବିଶେଷ କରି ଇରାନ ଦ୍ୱାରା ଆମେରିକୀୟ ବିମାନ ଖସାଇ ଦିଆଯିବା ପରେ ଉତ୍ତେଜନା ବଢିଛି, ମାତ୍ର ରାଷ୍ଟ୍ରପତି ଟ୍ରମ୍ପ ଏହା ଦ୍ୱାରା ଶାନ୍ତି ଆଲୋଚନା ପ୍ରଭାବିତ ହେବ ନାହିଁ ବୋଲି ଦୃଢୋକ୍ତି ପ୍ରକାଶ କରିଛନ୍ତି।
