କେନ୍ଦ୍ରମନ୍ତ୍ରୀ ସର୍ବାନନ୍ଦ ସୋନୋୱାଲଙ୍କ ପାରାଦୀପ ବନ୍ଦର ଗସ୍ତ, ୪୨୮ କୋଟିର ପ୍ରକଳ୍ପ ଉଦ୍‌ଘାଟନ କଲେ

ଆଗାମୀ ୨୦୩୦ ମସିହା ସୁଦ୍ଧା ପାରାଦୀପ ବନ୍ଦରର ବର୍ଥଗୁଡ଼ିକୁ ଶତପ୍ରତିଶତ ଯାନ୍ତ୍ରିକୀକରଣ କରିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି, ଯାହାକି ବର୍ତ୍ତମାନ ୮୦ ପ୍ରତିଶତ ରହିଛି। ନୂତନ ପ୍ରକଳ୍ପଗୁଡ଼ିକ କାର୍ଯ୍ୟକାରୀ ହେବା ଦ୍ୱାରା ଅଧିକ ଦ୍ରୁତ, ନିରାପଦ ଏବଂ ସ୍ୱଚ୍ଛ କାର୍ଗୋ ପରିଚାଳନା ସମ୍ଭବ ହୋଇପାରିବ। ଏହା ସହିତ ଜାହାଜଗୁଡ଼ିକର ରହଣି ସମୟ ଏବଂ ଲଜିଷ୍ଟିକ୍ସ ଖର୍ଚ୍ଚ ମଧ୍ୟ ଯଥେଷ୍ଟ ହ୍ରାସ ପାଇବ ।

ଏହା ବ୍ୟତୀତ, ପାରାଦୀପ ବନ୍ଦର ପ୍ରାଧିକରଣର ପ୍ରଶାସନିକ ଭବନରେ ନିର୍ମିତ ଏକ ଅତ୍ୟାଧୁନିକ ‘ମଡେଲ୍ ରୁମ୍’କୁ ମଧ୍ୟ ମନ୍ତ୍ରୀ ଉଦ୍‌ଘାଟନ କରିଥିଲେ। ଏହି ମଡେଲ୍ ରୁମ୍ ଜରିଆରେ ବନ୍ଦରର ବର୍ତ୍ତମାନର ସୁବିଧା, ମାନଚିତ୍ର ଏବଂ ଭବିଷ୍ୟତର ବିକାଶମୂଳକ ପ୍ରକଳ୍ପଗୁଡ଼ିକର ଏକ ସ୍ପଷ୍ଟ ପ୍ରତିଛବି ପ୍ରଦର୍ଶିତ ହେବ। ଫଳରେ ଅଧିକାରୀ ତଥା ନିବେଶକମାନେ ନୂତନ ପ୍ରକଳ୍ପଗୁଡ଼ିକର ସମୀକ୍ଷା ସହଜରେ କରିପାରିବେ ।

କେବଳ ବାଣିଜ୍ୟିକ ବିକାଶ ନୁହେଁ, ପରିବେଶ ସୁରକ୍ଷାକୁ ମଧ୍ୟ ବନ୍ଦର କର୍ତ୍ତୃପକ୍ଷ ବିଶେଷ ଗୁରୁତ୍ୱ ଦେଇଛନ୍ତି। କେନ୍ଦ୍ରମନ୍ତ୍ରୀ ଶ୍ରୀ ସୋନୋୱାଲ ବନ୍ଦର ପରିସରରେ ଏକ ଚାରାରୋପଣ କରି ବିଶାଳ ବୃକ୍ଷରୋପଣ ଅଭିଯାନର ଅଗ୍ରଗତିକୁ ଉତ୍ସାହିତ କରିଥିଲେ। ୧୯୯୯ ମହାବାତ୍ୟାର ବିଭୀଷିକା ପରେ ପାରାଦୀପରେ ହଜିଯାଇଥିବା ସବୁଜିମା ଫେରାଇ ଆଣିବା ପାଇଁ ବନ୍ଦର ପ୍ରଶାସନ ୧ ନିୟୁତ (୧୦ ଲକ୍ଷ) ବୃକ୍ଷରୋପଣ ଲକ୍ଷ୍ୟ ନେଇ କାର୍ଯ୍ୟ କରୁଛି। ଗତ ୪ ବର୍ଷ ଧରି ସ୍ଥାନୀୟ ବାସିନ୍ଦା ଏବଂ କର୍ମଚାରୀଙ୍କ ମିଳିତ ସହଯୋଗରେ ପ୍ରତିବର୍ଷ ପ୍ରାୟ ଏକ ଲକ୍ଷରୁ ଊର୍ଦ୍ଧ୍ୱ ଗଛ ଲଗାଯାଉଥିବା ପିପିଏ ପକ୍ଷରୁ ସୂଚନା ଦିଆଯାଇଛି ।