ମୁମ୍ବାଇ: NEET ପେପର ଲିକ୍କୁ ନେଇ ସାରା ଦେଶରେ ପ୍ରତିବାଦ ଜାରି ଥିବାବେଳେ ମୁମ୍ବାଇରେ ବିନା ଅନୁମତିରେ ବିକ୍ଷୋଭ କରିବା ଅଭିଯୋଗରେ ପୋଲିସ କଡ଼ା କାର୍ଯ୍ୟାନୁଷ୍ଠାନ ନେଇଛି। ମୁମ୍ବାଇ ପୋଲିସ ୧୮ରୁ ୨୨ ଜୁଲାଇ ମଧ୍ୟରେ ମୋଟ ୧୩ଟି FIR ରୁଜୁ କରିଥିବାବେଳେ ପ୍ରାୟ ୪୦୦ ଜଣଙ୍କୁ ଅଭିଯୁକ୍ତ କରିଛି। ଅଭିଯୁକ୍ତମାନଙ୍କୁ ନୋଟିସ ଜାରି କରି ଛାଡ଼ି ଦିଆଯାଇଛି।
ପୋଲିସ ସୂଚନା ଅନୁଯାୟୀ, ଏହି ବିକ୍ଷୋଭଗୁଡ଼ିକ ନୂଆଦିଲ୍ଲୀରେ Cockroach Janta Party (CJP) ନେତୃତ୍ୱରେ ଚାଲିଥିବା ଛାତ୍ର ଆନ୍ଦୋଳନକୁ ସମର୍ଥନ କରି ଆୟୋଜନ କରାଯାଇଥିଲା। ଛାତ୍ରଛାତ୍ରୀମାନେ ପରୀକ୍ଷା ବ୍ୟବସ୍ଥାରେ ସ୍ୱଚ୍ଛତା ଏବଂ ପେପର ଲିକ୍ ବନ୍ଦ କରିବା ଦାବି କରୁଛନ୍ତି। କିନ୍ତୁ ଏଥିପାଇଁ କୌଣସି ଅନୁମତି ନିଆଯାଇନଥିଲା ।
ଭାରତରେ ପ୍ରତିବାଦ କରିବା ନେଇ କ’ଣ କହୁଛି ନିୟମ?
ଭାରତୀୟ ସମ୍ବିଧାନର ଅନୁଚ୍ଛେଦ ୧୯(୧)(କ) ଅନୁଯାୟୀ ପ୍ରତ୍ୟେକ ନାଗରିକଙ୍କୁ ମତ ପ୍ରକାଶର ସ୍ୱାଧୀନତା ଏବଂ ଅନୁଚ୍ଛେଦ ୧୯(୧)(ଖ) ଅନୁଯାୟୀ ଅସ୍ତ୍ରବିହୀନ ଭାବେ ଶାନ୍ତିପୂର୍ଣ୍ଣ ପ୍ରତିବାଦ କରିବାର ଅଧିକାର ରହିଛି। କିନ୍ତୁ ଏହି ଅଧିକାର ସମ୍ପୂର୍ଣ୍ଣ ନିର୍ବନ୍ଧହୀନ ନୁହେଁ। ଜନଶୃଙ୍ଖଳା, ସୁରକ୍ଷା ଓ ଆଇନ ବ୍ୟବସ୍ଥା ବଜାୟ ରଖିବା ପାଇଁ ସମ୍ପୃକ୍ତ କର୍ତ୍ତୃପକ୍ଷଙ୍କ ଅନୁମତି ନେବା ଆବଶ୍ୟକ।