ରାୟଗଡ଼ା: ରାଜ୍ୟରେ ଆଇନ ଶୃଙ୍ଖଳା ପରିସ୍ଥିତିକୁ ନେଇ ପୁଣି ଏକ ସଂଗୀନ ମାମଲା ସାମ୍ନାକୁ ଆସିଛି। ପିଲା ଚୋର ସନ୍ଦେହ ଓ ମିଥ୍ୟା ଗୁଜବକୁ କେନ୍ଦ୍ର କରି ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ୍ରେ ଦୁଇଜଣ ସମାଜସେବୀ (ଏନ୍ଜିଓ କର୍ମୀ)ଙ୍କୁ ସ୍ଥାନୀୟ ଉତ୍ତ୍ୟକ୍ତ ଭିଡ଼ ଅତି ବର୍ବର ଭାବେ ଆକ୍ରମଣ କରିଛନ୍ତି।
ବିଶେଷ କରି ଦିଲ୍ଲୀରୁ ଆସିଥିବା ଜଣେ ମହିଳା ଛାତ୍ରୀଙ୍କୁ ବିବସ୍ତ୍ର କରି ନିର୍ଯାତନା ଦେବା ସହ ତାଙ୍କ ସହକାରୀଙ୍କୁ ନିସ୍ତୁକ ମାଡ଼ ମରାଯାଇଛି। ଗତ ଜୁନ୍ ୧୬ ତାରିଖ ବିଳମ୍ବିତ ରାତିରେ ଘଟିଥିବା ଏହି ସ୍ପର୍ଶକାତର ଘଟଣା ଏବେ ସୋସିଆଲ ମିଡିଆରେ ଭାଇରାଲ ହେବା ପରେ ଓଡ଼ିଶା ରାଜନୀତିରେ ଝଡ଼ ସୃଷ୍ଟି ହୋଇଛି। ବିରୋଧୀ ବିଜେଡି ଓ କଂଗ୍ରେସ ଏହି ପ୍ରସଙ୍ଗରେ ମୋହନ ମାଝୀ ସରକାରଙ୍କୁ ତୀବ୍ର ଟାର୍ଗେଟ୍ କରିଛନ୍ତି।
ସୂଚନା ଅନୁଯାୟୀ, ଆକ୍ରମଣର ଶିକାର ହୋଇଥିବା ଦୁଇ ଯୁବ ପ୍ରଫେସନାଲ ଜଣେ ଦିଲ୍ଲୀର ଯୁବତୀ ଓ ଅନ୍ୟ ଜଣେ ଗୁଜରାଟର ଯୁବକ ଓଡ଼ିଶାର ଏକ ପ୍ରତିଷ୍ଠିତ ଏନ୍ଜିଓ ସହ ଜଡ଼ିତ ରହି ଜନଜାତି ଅଞ୍ଚଳରେ ଫେଲୋସିପ୍ କରୁଥିଲେ। ସେମାନେ କନ୍ଧମାଳର ଦାରିଙ୍ଗବାଡ଼ିରୁ ଏକ ସ୍କୁଟର ଯୋଗେ କଳାହାଣ୍ଡିର ଥୁଆମୂଳ ରାମପୁର ଫେରୁଥିଲେ। ଅଜଣା ଅଞ୍ଚଳ ହୋଇଥିବାରୁ ସେମାନେ ରାସ୍ତା ପାଇଁ ଗୁଗୁଲ୍ ମ୍ୟାପ୍ର ସହାୟତା ନେଇ କଲ୍ୟାଣସିଂହପୁରର କାନ୍ଦୁଲଗୁଡ଼ା ଗ୍ରାମ ଭିତରକୁ ପଶିଯାଇଥିଲେ। ସେଠାରେ ରାସ୍ତା ପଚାରିବା ସହ ପିଲାମାନଙ୍କୁ ବିସ୍କୁଟ୍ ବାଣ୍ଟିବା ସମୟରେ କିଛି ଦୁର୍ବୃତ୍ତ ସେମାନଙ୍କୁ ‘ପିଲା ଚୋର’ କହି ଗୁଜବ ସୃଷ୍ଟି କରିଥିଲେ।