ପିୟୋଙ୍ଗୟାଙ୍ଗ୍ / ସିଓଲ୍: ଚଳିତ ବର୍ଷ ଆରମ୍ଭରେ ଉତ୍ତର କୋରିଆକୁ ଡ୍ରୋନ୍ ପଠାଇବା ଘଟଣାରେ ଦକ୍ଷିଣ କୋରିଆର ରାଷ୍ଟ୍ରପତି ଲି ଜାଏ ମ୍ୟୁଙ୍ଗ (Lee Jae Myung) ଦୁଃଖ ପ୍ରକାଶ କରିବା ସହ ଏହାକୁ ଏକ ‘ବେପରୁଆ’ କାର୍ଯ୍ୟ ବୋଲି କହିଛନ୍ତି। ଏହା ଉପରେ ପ୍ରତିକ୍ରିୟା ରଖି ଉତ୍ତର କୋରିଆ ଶାସକ କିମ୍ ଜୋଙ୍ଗ୍ ଉନ୍ଙ୍କ ପ୍ରଭାବଶାଳୀ ଭଉଣୀ କିମ୍ ୟୋ ଜୋଙ୍ଗ୍ (Kim Yo Jong) ସୋମବାର (ଏପ୍ରିଲ୍ ୬, ୨୦୨୬) କହିଛନ୍ତି ଯେ, ସିଓଲ୍ର ଏହି ଦୁଃଖ ପ୍ରକାଶ ତାଙ୍କ ନିଜ ପାଇଁ ଏକ “ବୁଦ୍ଧିମାନର କାମ”।
ସୂଚନାଯୋଗ୍ୟ ଯେ, ଗତ ଜାନୁଆରୀରେ ଉତ୍ତର କୋରିଆ ସୀମାରେ ଡ୍ରୋନ୍ ପ୍ରବେଶ କରିବା ଘଟଣାରେ ପ୍ରଥମେ ଦକ୍ଷିଣ କୋରିଆ ସରକାର ନିଜର ସମ୍ପୃକ୍ତିକୁ ଅସ୍ୱୀକାର କରିଥିଲେ ଏବଂ ଏହା ସାଧାରଣ ନାଗରିକଙ୍କ କାମ ବୋଲି କହିଥିଲେ। କିନ୍ତୁ ଏବେ ରାଷ୍ଟ୍ରପତି ଲି ଜାଏ ମ୍ୟୁଙ୍ଗ୍ କହିଛନ୍ତି ଯେ ଏକ ତଦନ୍ତରୁ ଏଥିରେ ସରକାରୀ ଅଧିକାରୀଙ୍କ ସମ୍ପୃକ୍ତି ଥିବା ଜଣାପଡ଼ିଛି। ଏକ କ୍ୟାବିନେଟ୍ ବୈଠକରେ ଲି କହିଛନ୍ତି, “ଏହା ସ୍ପଷ୍ଟ ହୋଇଛି ଯେ ଆମର ଜାତୀୟ ଗୁଇନ୍ଦା ସଂସ୍ଥାର (NIS) ଜଣେ ଅଧିକାରୀ ଏବଂ ଜଣେ କାର୍ଯ୍ୟରତ ସୈନିକ ଏଥିରେ ସମ୍ପୃକ୍ତ ଥିଲେ।”
କିଛି ବ୍ୟକ୍ତିଙ୍କ ବେପରୁଆ କାର୍ଯ୍ୟ ଯୋଗୁଁ ସୃଷ୍ଟି ହୋଇଥିବା ଏହି ଅନାବଶ୍ୟକ ସାମରିକ ଉତ୍ତେଜନା ପାଇଁ ସେ ଉତ୍ତର କୋରିଆ ନିକଟରେ ଦୁଃଖ ପ୍ରକାଶ କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଦକ୍ଷିଣ କୋରିଆର ସମ୍ବିଧାନ ସାଧାରଣ ନାଗରିକମାନଙ୍କୁ ଉତ୍ତର କୋରିଆ ବିରୋଧରେ କୌଣସି ଉତ୍ତେଜକ କାର୍ଯ୍ୟ କରିବାକୁ ବାରଣ କରେ।
ଉତ୍ତର କୋରିଆର ସରକାରୀ ନ୍ୟୁଜ୍ ଏଜେନ୍ସି ‘କେସିଏନଏ’ (KCNA) ଦ୍ୱାରା ଜାରି କରାଯାଇଥିବା ଏକ ବିବୃତ୍ତିରେ କିମ୍ ୟୋ ଜୋଙ୍ଗ୍ କହିଛନ୍ତି, “ଦକ୍ଷିଣ କୋରିଆ ରାଷ୍ଟ୍ରପତି ବ୍ୟକ୍ତିଗତ ଭାବେ ଦୁଃଖ ପ୍ରକାଶ କରିବା ସହ ଏଭଳି ଘଟଣାର ଯେପରି ପୁନରାବୃତ୍ତି ନହୁଏ, ସେନେଇ ପଦକ୍ଷେପ ନେବେ ବୋଲି କହିଛନ୍ତି। ଆମ ସରକାର ଏହାକୁ ସେମାନଙ୍କ ନିଜ ପାଇଁ ଏକ ବୁଦ୍ଧିମାନର କାର୍ଯ୍ୟ ବୋଲି ବିବେଚନା କରୁଛନ୍ତି।” ତାଙ୍କ ଭାଇ କିମ୍ ଜୋଙ୍ଗ୍ ଉନ୍ ମଧ୍ୟ ଦକ୍ଷିଣ କୋରିଆ ରାଷ୍ଟ୍ରପତିଙ୍କ ଏହି ମନ୍ତବ୍ୟକୁ ଜଣେ “ସ୍ପଷ୍ଟବାଦୀ ଏବଂ ଉଦାର ମନୋଭାବ ସମ୍ପନ୍ନ ବ୍ୟକ୍ତିଙ୍କ ଆଭିମୁଖ୍ୟ” ବୋଲି ଗ୍ରହଣ କରିଥିବା ସେ କହିଛନ୍ତି।
ତେବେ ଏହା ସହିତ କିମ୍ ୟୋ ଜୋଙ୍ଗ୍ ଏକ କଡ଼ା ଚେତାବନୀ ମଧ୍ୟ ଦେଇଛନ୍ତି। “ଯଦି ଆମ ଦେଶର ସାର୍ବଭୌମତ୍ୱକୁ ଉଲ୍ଲଂଘନ କରିବା ଭଳି କାର୍ଯ୍ୟ ଭବିଷ୍ୟତରେ ପୁଣିଥରେ ଘଟେ, ତେବେ ଦକ୍ଷିଣ କୋରିଆକୁ ଏହାର ବଡ଼ ମୂଲ୍ୟ ଚୁକାଇବାକୁ ପଡ଼ିବ” ବୋଲି ସେ ସତର୍କ କରାଇ ଦେଇଛନ୍ତି। ପୂର୍ବରୁ ଫେବୃଆରୀ ମାସରେ ଉତ୍ତର କୋରିଆ ଚେତାବନୀ ଦେଇଥିଲା ଯେ ଯଦି ଦକ୍ଷିଣ ପଟୁ ଆଉ କୌଣସି ଡ୍ରୋନ୍ ସୀମା ପାର୍ ହୁଏ, ତେବେ ଏହାର “ଭୟଙ୍କର ପରିଣାମ” ଭୋଗିବାକୁ ପଡ଼ିବ। ଜାନୁଆରୀ ଆରମ୍ଭରେ ‘ସର୍ଭିଲାନ୍ସ ଉପକରଣ’ ଥିବା ଏକ ଡ୍ରୋନ୍କୁ ଖସାଇ ଦିଆଯାଇଥିବା ପିୟୋଙ୍ଗୟାଙ୍ଗ୍ ଦାବି କରିଥିଲା ଏବଂ କ୍ୟାମେରା ଲାଗିଥିବା ଏହି ଡ୍ରୋନ୍ର ଭଗ୍ନାବଶେଷର ଫଟୋ ମଧ୍ୟ ଜାରି କରିଥିଲା।
ଗତ ବର୍ଷ କ୍ଷମତାକୁ ଆସିବା ପରେ ଦକ୍ଷିଣ କୋରିଆ ରାଷ୍ଟ୍ରପତି ଲି ଜାଏ ମ୍ୟୁଙ୍ଗ୍ ନିଜ ପଡ଼ୋଶୀ ଦେଶ ଉତ୍ତର କୋରିଆ ସହ ସମ୍ପର୍କ ସୁଧାରିବାକୁ ଲଗାତାର ଚେଷ୍ଟା କରୁଛନ୍ତି।
ଉତ୍ତର କୋରିଆକୁ ଡ୍ରୋନ୍ ପଠାଇ ଉତ୍ତେଜନା ସୃଷ୍ଟି କରିବା ଏବଂ ଦେଶରେ ସାମରିକ ଶାସନ (Martial law) ଲାଗୁ କରିବା ଅଭିଯୋଗରେ ଗତ ବର୍ଷ ଏପ୍ରିଲରେ (୨୦୨୫) ୟୁନ୍ଙ୍କୁ ପଦଚ୍ୟୁତ କରାଯାଇଥିଲା ଏବଂ ବର୍ତ୍ତମାନ ସେ ଆଜୀବନ କାରାଦଣ୍ଡ ଭୋଗୁଛନ୍ତି।
ଅନ୍ୟପକ୍ଷରେ, ଦକ୍ଷିଣ କୋରିଆର ଏହି ଶାନ୍ତି ପ୍ରସ୍ତାବ ସତ୍ତ୍ୱେ ମାର୍ଚ୍ଚ ମାସରେ ଏକ ନୀତିଗତ ସମ୍ବୋଧନରେ କିମ୍ ଜୋଙ୍ଗ୍ ଉନ୍ ସିଓଲ୍କୁ ଏକ “ଚରମ ଶତ୍ରୁ ରାଷ୍ଟ୍ର” ଭାବେ ଆଖ୍ୟା ଦେବା ସହ ନିଜର ପରମାଣୁ ଅସ୍ତ୍ର କାର୍ଯ୍ୟକ୍ରମକୁ “ଅପରିବର୍ତ୍ତନୀୟ” ଦର୍ଶାଇ ଏହାକୁ ଆହୁରି ମଜବୁତ କରିବା ନେଇ ଘୋଷଣା କରିଥିଲେ।
