କିଭ୍/ମସ୍କୋ: ଦୀର୍ଘଦିନ ଧରି ଚାଲିଥିବା ଯୁଦ୍ଧ ମଧ୍ୟରେ ଋଷ ପକ୍ଷରୁ ୟୁକ୍ରେନ ଉପରେ ଏପର୍ଯ୍ୟନ୍ତର ସବୁଠାରୁ ବଡ଼ ଏବଂ ଭୟାବହ ବାୟୁ ଆକ୍ରମଣ କରାଯାଇଛି। ଶନିବାର ବିଳମ୍ବିତ ରାତିରୁ ରବିବାର ପର୍ଯ୍ୟନ୍ତ ହୋଇଥିବା ଏହି ଆକ୍ରମଣ ପରେ ଯୁଦ୍ଧ ଆହୁରି ଭୟଙ୍କର ରୂପ ନେଇଛି ଏବଂ ଶାନ୍ତି ପ୍ରତିଷ୍ଠା ପ୍ରୟାସକୁ ଏକ ଶକ୍ତ ଧକ୍କା ଲାଗିଛି।
ୟୁକ୍ରେନୀୟ ଅଧିକାରୀଙ୍କ ମତରେ, ଏହି ଆକ୍ରମଣ ଏକ ଅଭୂତପୂର୍ବ ସ୍ତରରେ କରାଯାଇଥିଲା, ଯାହାଦ୍ୱାରା ଦେଶର ବ୍ୟାପକ କ୍ଷୟକ୍ଷତି ହେବାର ଆଶଙ୍କା ରହିଛି। ପ୍ରାଥମିକ ସୂଚନା ଅନୁଯାୟୀ, ଏହି ଆକ୍ରମଣରେ ଜଣେ ବ୍ୟକ୍ତିଙ୍କ ମୃତ୍ୟୁ ଘଟିଥିବା ବେଳେ ମୃତାହତଙ୍କ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି।
ୟୁକ୍ରେନୀୟ ବାୟୁସେନା ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଏହି ଆକ୍ରମଣ ସମୟରେ ଋଷ ସମୁଦାୟ ୪୭୭ଟି ଡ୍ରୋନ୍ ଏବଂ ୬୦ଟି କ୍ଷେପଣାସ୍ତ୍ର ମାଡ଼ କରିଥିଲା। ତେବେ, ୟୁକ୍ରେନର ପ୍ରତିରକ୍ଷା ବାହିନୀ ଏଥିମଧ୍ୟରୁ ୨୪୯ଟି ଡ୍ରୋନ୍କୁ ଆକାଶରେ ହିଁ ଖସାଇ ଦେଇଥିବା ଦାବି କରିଛି। ସେହିପରି, ୨୨୬ଟି ଡ୍ରୋନ୍ ଏବଂ କ୍ଷେପଣାସ୍ତ୍ରକୁ ଇଲେକ୍ଟ୍ରୋନିକ୍ ଯୁଦ୍ଧ ପ୍ରଣାଳୀ (Electronic Warfare) ଦ୍ୱାରା ଜାମ୍ କରିଦିଆଯାଇଥିବା କୁହାଯାଇଛି।
ବାୟୁସେନାର ମୁଖପାତ୍ର ୟୁରି ଇହନାଟ୍ ଆସୋସିଏଟେଡ୍ ପ୍ରେସକୁ କହିଛନ୍ତି ଯେ, ଏହା ୟୁକ୍ରେନ ଉପରେ ହୋଇଥିବା “ଏପର୍ଯ୍ୟନ୍ତର ସବୁଠାରୁ ବଡ଼ ବାୟୁ ଆକ୍ରମଣ” ଥିଲା, ଯେଉଁଥିରେ ବିଭିନ୍ନ ପ୍ରକାରର କ୍ଷେପଣାସ୍ତ୍ର ସମେତ ଶାହେଦ୍ (କାମିକାଜେ) ଡ୍ରୋନ୍ ବ୍ୟବହାର କରାଯାଇଥିଲା।