କୁନୋ ଜାତୀୟ ଉଦ୍ୟାନରେ ଏ ପର୍ଯ୍ୟନ୍ତ ୩ ଛୁଆଙ୍କ ସହ ୫ ଚିତାଙ୍କର ମୃତ୍ୟୁ ହୋଇଛି। କ୍ରମାଗତ ଭାବେ ବଢ଼ିଚାଲିଥିବା ଚିତା ମୃତ୍ୟୁକୁ ନେଇ ବର୍ତ୍ତମାନ ସୁପ୍ରିମକୋର୍ଟ ଉଦ୍ବେଗ ପ୍ରକାଶ କରିଛନ୍ତି। ସୁପ୍ରିମକୋର୍ଟ ଏକ ପିଟିସନର ଶୁଣାଣି ବେଳେ କହିଛନ୍ତି ଯେ ଦକ୍ଷିଣ ଆଫ୍ରିକା ଏବଂ ନାମ୍ବିଆରୁ ଯେତିକି ଚିତା ଅଣାଯାଇଥିଲା, ସେଥିମଧ୍ୟରୁ ୪୦ ପ୍ରତିଶତ ଚିତାଙ୍କର ମୃତ୍ୟୁ ହୋଇସାରିଛି। ଏତେ ସଂଖ୍ୟକ ଚିତା ମୃତ୍ୟୁ ଭଲ ନୁହେଁ। ଏହି ପ୍ରସଙ୍ଗରେ କୋର୍ଟ ଏକ ପରାମର୍ଶ ମଧ୍ୟ ଦେଇଛନ୍ତି।
ଜଷ୍ଟିସ ବିଆର ଗଭଇଙ୍କ ନେତୃତ୍ୱାଧୀନ ବେଞ୍ଚ ଗୁରୁବାର ଶୁଣାଣି ବେଳେ କେନ୍ଦ୍ର ସରକାରଙ୍କୁ ଏକ ପରାମର୍ଶ ଦେଇଛି। ଏଥିରେ ମଧ୍ୟ ପ୍ରଦେଶର ଶୋପୁର ଜିଲ୍ଲାରେ ଥିବା କୁନୋ ଜାତୀୟ ଉଦ୍ୟାନର ଚିତାଙ୍କୁ ରାଜସ୍ଥାନ ସ୍ଥାନାନ୍ତର କରିବାକୁ ପରାମର୍ଶ ଦିଆଯାଇଛି। ସୁପ୍ରିମକୋର୍ଟ କହିଛନ୍ତି କି, କେନ୍ଦ୍ର ସରକାର ରାଜନୀତିଠାରୁ ଊର୍ଦ୍ଧ୍ୱରେ ଉଠି କୁନୋରୁ କିଛି ଚିତାଙ୍କୁ ରାଜସ୍ଥାନ ସ୍ଥାନାନ୍ତର କରାଇବା ଉଚିତ୍।
ସୁପ୍ରିମକୋର୍ଟ କହିଛନ୍ତି, କୁନୋରେ ୮ ଚିତାଙ୍କର ମୃତ୍ୟୁ ହୋଇଛି। ସେମାନଙ୍କ ମଧ୍ୟରୁ ଦୁଇଟି ଚିତାଙ୍କର ଗତ ସପ୍ତାହରେ ମୃତ୍ୟୁ ହୋଇଥିଲା। ଏପରି ସ୍ଥିତିରେ ଚିତାମାନଙ୍କୁ ପୃଥକ ଭାବରେ କାହିଁକି ରଖାଯାଇ ନାହିଁ। ତେଣୁ ବର୍ତ୍ତମାନ ଏହି ପ୍ରୋଜେକ୍ଟରେ କିଛି ସକାରାତ୍ମକ ପଦକ୍ଷେପ ନେବାକୁ ପଡ଼ିବ।
ସୁପ୍ରିମକୋର୍ଟରେ ଶୁଣାଣି ସମୟରେ କେନ୍ଦ୍ର ସରକାରଙ୍କ ତରଫରୁ ଅତିରିକ୍ତ ସଲିସିଟର ଜେନେରାଲ ଐଶ୍ୱର୍ଯ୍ୟା ଭାଟି ପକ୍ଷ ରଖିଥିଲେ। ସେ କହିଥିଲେ ଯେ ଏହି ଘଟଣାର ବିସ୍ତୃତ ରିପୋର୍ଟ ଶୀଘ୍ର ଦାଖଲ କରାଯିବ। ନୂଆ ଜାଗାରେ ଚିତାମାନେ ଖାପଖୁଆଇବା ସମୟରେ ୫୦% ପର୍ଯ୍ୟନ୍ତ ମୃତ୍ୟୁ ସ୍ୱାଭାବିକ ବୋଲି ବିବେଚନା କରାଯାଏ।