ଜୟପୁର: ରାଜସ୍ଥାନର ଯୋଧପୁରର ଜଣେ ଯୁବକ ଏମିତି ଏକ କାମ କରିଛନ୍ତି ଯାହାକୁ ନେଇ ଚର୍ଚ୍ଚା ଜୋର ଧରିଛି | ଏହି ଯୁବକ ଜଣକ ତାଙ୍କ କାରରେ କଏନ ଲଗାଇ ଏହାର ରୂପ ବଦଳାଇଦେଇଛନ୍ତି | ଯୁବକ ଜଣକ ସୋସିଆଲ ମିଡିଆରେ ଏହା ସହ ଜଡିତ ଏକ ଭିଡିଓ ମଧ୍ୟ ସେୟାର କରିଛନ୍ତି ଯେଉଁଥିରେ ସେ କାରରେ ମୁଦ୍ରା ଲଗାଉଥିବାର ନଜର ଆସିଛନ୍ତି। ତେବେ ଏହି ଭିଡିଓକୁ ନେଇ ମିଶ୍ର ପ୍ରତିକ୍ରିୟା ସାମ୍ନାକୁ ଆସିଛି | କିଛି ଲୋକ ତାଙ୍କୁ ଉତ୍ସାହିତ କରୁଥିବାବେଳେ କିଛି ତାଙ୍କୁ ପରିହାସ ମଧ୍ୟ କରୁଛନ୍ତି | ଜଣେ ସୋସିଆଲ ମିଡିଆ ୟୁଜର୍ସ କଟାକ୍ଷ କରି ଲେଖିଛନ୍ତି ଯେ ଏହି ବ୍ୟକ୍ତି କାରରେ ମୁଦ୍ରା ଲଗାଇଥିବାରୁ ବୋଧହୁଏ ବଜାରରେ ମୁଦ୍ରା ମିଳୁନାହିଁ । ବାସ୍ତବରେ ଯୋଧପୁରର ଯୁବକ ବିକାଶ ପାରିକ ଏଭଳି ଏକ କାରନାମା କରି ଦେଖାଇଛନ୍ତି | ସେ ବହୁଦିନ ଧରି କଏନ ସଂଚୟ କରି ରଖିଥିଲେ |
ଯେତେବେଳେ ତାଙ୍କ ପାଖରେ ୨୫୦୦୦ ଟଙ୍କା ମୂଲ୍ୟର କଏନ ଜମା ହେଲା, ସେ ଏହାକୁ କାରରେ ଅଠା ମାଧ୍ୟମରେ ଲଗାଇଥିଲେ | ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ ଲୋକମାନେ ଏହାକୁ କଏନ କାର ବୋଲି କହିଛନ୍ତି । ବିକାଶ କହିଛନ୍ତି ଯେ ମୋ ବାପାଙ୍କର ଏକ ଦୋକାନ ଥିଲା | ସେଠାରୁ ମୁଦ୍ରା ସଂଗ୍ରହ କରିଥିଲି | ମୋ ଭଉଣୀ ଏବଂ ମା ମଧ୍ୟ ମୁଦ୍ରା ସଂଗ୍ରହରେ ବହୁତ ସାହାଯ୍ୟ କରିଥିଲେ | ବାପା ଏକ କାର କିଣିଥିଲେ, ସେହି କାରଟି ଆମ ପରିବାରର ପ୍ରଥମ କାର ଥିଲା | ଅନ୍ୟ ପଟେ ମୁଦ୍ରା ମଧ୍ୟ ସଂଗ୍ରହ କରାଯାଇଥିଲା। ତେଣୁ ମୁଁ ଭାବିଲି ଏହି କାରକୁ ମୁଦ୍ରାରେ ସଜାଇବି | ବିକାଶ କହିଛନ୍ତି ଯେ କାରକୁ ମୁଦ୍ରାରେ ସଜାଇବା ପରେ ମୋ କାର ରୂପା ପରି ଦେଖାଯାଉଥିଲା |
