ସିଙ୍ଗାପୁର: ହର୍ମୁଜ ପ୍ରଣାଳୀ ଦେଇ ଯାତ୍ରା କରୁଥିବା ସିଙ୍ଗାପୁରର ୨ଟି ପଣ୍ୟବାହୀ ଜାହାଜ ଉପରେ କ୍ଷେପଣାସ୍ତ୍ର ମାଡ଼ ହୋଇଛି। ଜିଏଫଏସ୍ ପ୍ରାଇଡ୍ ନାମକ ଏକ ପଣ୍ୟବାହୀ ଜାହାଜ ଉପରେ କ୍ଷେପଣାସ୍ତ୍ର ମାଡ଼ ହେବା ଫଳରେ ତାହା ସମୁଦ୍ରରେ ବୁଡ଼ି ଯାଇଥିଲା। ତେବେ ଏଥିରେ ଥିବା ୨୧ଜଣ ନାବିକଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ସେହିପରି ଜିଏଫଏସ୍ ଗିସେଲେ ନାମକ ଅନ୍ୟ ଏକ ପଣ୍ୟବାହୀ ଜାହାଜ ଉପରେ କ୍ଷେପଣାସ୍ତ୍ର ମାଡ଼ ହୋଇଥିଲା। ଏଥିରେ ଜାହାଜର କ୍ଷତି ଘଟିଥିଲେ ମଧ୍ୟ ତାହା ସୁରକ୍ଷିତ ଥିବା ଜଣାପଡ଼ିଛି। ଏହି ଜାହାଜରେ ଥିବା ୨୨ ଜଣ ନାବିକ ଠିକ୍ ଥିବା ଜଣାପଡ଼ିଛି। ଦୁଇଟି ଯାକ ଜାହାଜରେ ସିଙ୍ଗାପୁରର କୌଣସି ନାବିକ ନ ଥିଲେ। ପଣ୍ୟବାହୀ ଜାହାଜ ଉପରେ କ୍ଷେପଣାସ୍ତ୍ର ମାଡ଼କୁ ନେଇ ସିଙ୍ଗାପୁର ତରଫରୁ ଚିନ୍ତାବ୍ୟକ୍ତ କରାଯାଇଛି। ଅନ୍ୟପକ୍ଷରେ ଇରାନର ଆଇଆରଜିସି ତରଫରୁ ବୁଧବାର କୁହାଯାଇଛି ଯେ ହର୍ମୁଜ୍ ଦେଇ ଯାତ୍ରା କରୁଥିବା ଏକ ଜାହାଜ ବିପଦପୂର୍ଣ୍ଣ ରାସ୍ତାରେ ଯାଉଥିବା ବେଳେ ସମୁଦ୍ର ତଳେ ବିଛା ଯାଇଥିବା ଏକ ମାଇନ୍ସ ସହ ମାଡ଼ ହେବାରୁ ବିସ୍ଫୋରଣ ହୋଇଥିଲା। ଫଳରେ ଜାହାଜଟି ସମୁଦ୍ରରେ ବୁଡ଼ି ଯାଇଥିଲା।