ଚନ୍ଦ୍ରଭାଗାରେ ଦୁଇ ଭାଇଙ୍କୁ ସଂଘବଦ୍ଧ ଆକ୍ରମଣ

କୋଣାର୍କ: ପୁରୀ ଜିଲ୍ଲାର ଚନ୍ଦ୍ରଭାଗା ବଜାରରେ ଶୁକ୍ରବାର ବିଳମ୍ବିତ ରାତିରେ ଘଟିଛି ଏକ ସଂଘବଦ୍ଧ ଆକ୍ରମଣ। ପ୍ରାୟ ୧୫ ଜଣ ଅଜଣା ଯୁବକଙ୍କ ଆକ୍ରମଣରେ ଦୁଇ ଭାଇ ଗୁରୁତର ଆହତ ହୋଇଥିବା ବେଳେ କୋଣାର୍କ ପୋଲିସ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଛି।

ସୂଚନା ଅନୁଯାୟୀ, ରଶ୍ମିରଞ୍ଜନ ବେହୁରା, ତାଙ୍କ ସାନଭାଇ କମଳ ଲୋଚନ ବେହୁରା ଓ ଅନ୍ୟ ଚାରିଜଣ ନାଗପୁରରେ ରେ ଜଣେ ସମ୍ପର୍କୀୟଙ୍କ ବିବାହ ଭୋଜିରେ ଯୋଗଦେଇ ଏକ କାରରେ ଘରକୁ ଫେରୁଥିଲେ। ରାତିରେ ଚନ୍ଦ୍ରଭାଗା ବଜାରରେ କାର ଅଟକାଇ ରଶ୍ମିରଞ୍ଜନ ପରିସ୍ରା କରିବାକୁ ଯାଇଥିବା ବେଳେ, ପୂର୍ବରୁ ଦୁଇଟି କାରରେ ଆସିଥିବା ପ୍ରାୟ ୧୫ ଜଣ ଅଜଣା ଯୁବକ ତାଙ୍କ ସହ ଯୁକ୍ତିତର୍କ କରି ହଠାତ୍ ସଂଘବଦ୍ଧ ଭାବେ ଆକ୍ରମଣ କରିଥିଲେ।ରଶ୍ମିରଞ୍ଜନଙ୍କୁ ବଞ୍ଚାଇବାକୁ ଯାଇଥିବା ତାଙ୍କ ସାନଭାଇ କମଳ ଲୋଚନଙ୍କ ଉପରେ ମଧ୍ୟ ଦୁର୍ବୃତ୍ତମାନେ ଲୁହା ରଡରେ ମରଣାନ୍ତକ ଆକ୍ରମଣ କରିଥିଲେ। ଏଥିରେ ରଶ୍ମିରଞ୍ଜନଙ୍କ ମୁଣ୍ଡ ଓ ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ଲାଗିଥିବା ବେଳେ କମଳ ଲୋଚନ ମଧ୍ୟ ଗୁରୁତର ଆହତ ହୋଇଛନ୍ତି।