ଭୁବନେଶ୍ୱର : ଏକ ରାଜନୈତିକ ଘଟଣାକ୍ରମେ, ଭାରତୀୟ ଜନତା ପାର୍ଟି (ବିଜେପି) ମଙ୍ଗଳବାର ଦିନ ପଶ୍ଚିମ ବଙ୍ଗରେ ଦଳର ବିଧାୟକ ଦଳ ନେତାଙ୍କ ନିର୍ବାଚନ ପାଇଁ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କୁ ସହ-ପର୍ଯ୍ୟବେକ୍ଷକ ଭାବରେ ନିଯୁକ୍ତ କରିଛି ଯାହା ମୁଖ୍ୟମନ୍ତ୍ରୀଙ୍କ ନିର୍ବାଚନ ଏବଂ ସରକାର ଗଠନ ପାଇଁ ପଥ ପ୍ରଶସ୍ତ କରିଛି ।
କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କୁ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବରେ ନିଯୁକ୍ତ କରାଯାଇଛି । ବିଜେପି ଜାତୀୟ ସାଧାରଣ ସମ୍ପାଦକ ଅରୁଣ ସିଂହଙ୍କ ଦ୍ୱାରା ଜାରି ଏକ ସରକାରୀ ସୂଚନା ଅନୁଯାୟୀ, ଦଳର ସଂସଦୀୟ ବୋର୍ଡ ଅମିତ ଶାହଙ୍କୁ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବରେ ନିଯୁକ୍ତ କରିବାକୁ ନିଷ୍ପତ୍ତି ନେଇଛି, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ସହ-ପର୍ଯ୍ୟବେକ୍ଷକ ଭାବରେ ସହାୟତା କରିବେ ।
ବଢୁଛି ମୁଖ୍ୟମନ୍ତ୍ରୀ ମୋହନ ମାଝୀଙ୍କ ଦବଦବା । ପଶ୍ଚିମବଙ୍ଗ ବିଜେପି ବିଧାୟକ ଦଳ ନେତା ଚୟନ ପାଇଁ ମୋହନଙ୍କୁ ବଡ଼ ଦାୟିତ୍ବ । କେନ୍ଦ୍ର ମନ୍ତ୍ରୀ ଅମିତ ଶାହଙ୍କ ସହ ମିଶି ବାଛିବେ ବିଧାୟକ ଦଳ ନେତା । ବିଜେପିର କେନ୍ଦ୍ରୀୟ ରଣନୀତିରେ ମୋହନ ମାଝୀଙ୍କ ଗୁରୁତ୍ବ ବଢିବାରେ ଲାଗିଥିବା ଏଥିରୁ ସ୍ପଷ୍ଟ ହେଉଛି । ବେଙ୍ଗଲରେ ବିଜେପିର ଐତିହାସିକ ବିଜୟ ପରେ, ସେଠାରେ ବିଧାୟକ ଦଳ ନେତା ଚୟନ ପାଇଁ କେନ୍ଦ୍ରୀୟ ପର୍ଯ୍ୟବେକ୍ଷକ ଭାବେ ଅମିତ ଶାହଙ୍କ ସହ ମୋହନ ମାଝୀଙ୍କୁ ସହ-ପର୍ଯ୍ୟବେକ୍ଷକ ଦାୟିତ୍ୱ ମିଳିଛି । ପଶ୍ଚିମବଙ୍ଗ ନିର୍ବାଚନ ସମୟରେ ମୋହନ ମାଝୀ କେବଳ ଜଣେ ଷ୍ଟାର ପ୍ରଚାରକ ଭାବେ ସୀମିତ ନଥିଲେ ।
ସେ ବୀରଭୂମ, ଯାଦବପୁର ଏବଂ କଲିକତାର ଗଳିକନ୍ଦିରେ ରୋଡ୍ ସୋ’ କରିବା ସହ ବିଶେଷ କରି ଆଦିବାସୀ ବହୁଳ ଜଙ୍ଗଲମହଲ ଅଞ୍ଚଳରେ ବିଜେପି ପାଇଁ ଭୋଟ୍ ସାଉଣ୍ଟିଥିଲେ । ଜଣେ ଦକ୍ଷ ସାନ୍ତାଳୀ ନେତା ଭାବେ ତାଙ୍କର ପରିଚୟ ବଙ୍ଗଳାର ଆଦିବାସୀ ଭୋଟରଙ୍କୁ ବିଜେପି ସହ ଯୋଡ଼ିବାରେ ବଡ଼ ମାଧ୍ୟମ ସାଜିଥିଲା । ଏବେ ସରକାର ଗଠନ ପ୍ରକ୍ରିୟାରେ ତାଙ୍କୁ ସାମିଲ କରିବା ଦର୍ଶାଉଛି ଯେ, ବିଜେପି ହାଇକମାଣ୍ଡ ତାଙ୍କ ଉପରେ କେତେ ଗଭୀର ଆସ୍ଥା ପ୍ରକଟ କରିଛନ୍ତି । ତେବେ ନୂଆ ଭୂମିକାରେ ମୋହନ ମାଝୀଙ୍କ ଭୂମିକା କାହିଁକି ଗୁରୁତ୍ବପୂର୍ଣ୍ଣ । ଓଡ଼ିଶାର ମୁଖ୍ୟମନ୍ତ୍ରୀ ଭାବେ ଦାୟିତ୍ୱ ନେବାର କିଛି ମାସ ମଧ୍ୟରେ ସେ ନିଜକୁ ଜଣେ ଦକ୍ଷ ସାଂଗଠନିକ ନେତା ଭାବେ ପ୍ରମାଣିତ କରିଛନ୍ତି ।
ରାଜ୍ୟ ବାହାରେ ସମ୍ବେଦନଶୀଳ ରାଜନୈତିକ ନିଷ୍ପତ୍ତି ନେବାରେ ତାଙ୍କୁ ସାମିଲ କରିବା ତାଙ୍କର ବଢୁଥିବା ପ୍ରାଧାନ୍ୟକୁ ଦର୍ଶାଉଛି । ପୂର୍ବ ଭାରତରେ ବିଜେପି ନିଜର ପତିଆରା ବଢ଼ାଇବା ପାଇଁ ମୋହନ ମାଝୀଙ୍କୁ ଏକ ସେତୁ ଭାବେ ବ୍ୟବହାର କରୁଛି । ତାଙ୍କ ଜରିଆରେ ଓଡ଼ିଶା, ପଶ୍ଚିମବଙ୍ଗ ଏବଂ ଝାଡ଼ଖଣ୍ଡ ଭଳି ରାଜ୍ୟରେ ଆଦିବାସୀ ଭୋଟରଙ୍କୁ ଏକଜୁଟ କରିବା ଦଳର ମୂଳ ଲକ୍ଷ୍ୟ । ଅମିତ ଶାହଙ୍କ ଭଳି ଚାଣକ୍ୟଙ୍କ ସହ ମିଶି କାମ କରିବା ମୋହନ ମାଝୀଙ୍କୁ ଜାତୀୟ ରାଜନୀତିର ଜଟିଳ ଗୋଟି ଚାଳନା ଶିଖିବାରେ ସାହାଯ୍ୟ କରିବ । ସହ କେନ୍ଦ୍ରୀୟ ପର୍ଯ୍ୟବେକ୍ଷକ ନିଯୁକ୍ତି ପରେ ଏହା ସ୍ପଷ୍ଟ ଯେ, ମୋହନ ମାଝୀ କେବଳ ଓଡ଼ିଶାର ମୁଖ୍ୟମନ୍ତ୍ରୀ ହୋଇ ରହିନାହାଁନ୍ତି, ବରଂ ବିଜେପିର ‘ମିଶନ ଇଷ୍ଟ’ ପାଇଁ ସେ ଜଣେ ଅପରିହାର୍ଯ୍ୟ ରଣନୀତିକାର ଭାବେ ଉଭା ହୋଇଛନ୍ତି ।
ଏହି ନିଯୁକ୍ତିଗୁଡ଼ିକୁ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି କାରଣ ପର୍ଯ୍ୟବେକ୍ଷକମାନେ ବିଧାନସଭା ଦଳ ନେତା ଚୟନର ସମଗ୍ର ପ୍ରକ୍ରିୟାକୁ ନିକଟରୁ ତଦାରଖ କରିବେ, ଯାହା ପଶ୍ଚିମବଙ୍ଗ ପାଇଁ ବିଜେପିର ସମ୍ଭାବ୍ୟ ମୁଖ୍ୟମନ୍ତ୍ରୀ ପ୍ରାର୍ଥୀ ନିର୍ଣ୍ଣୟ କରିବାରେ ପ୍ରମୁଖ ଭୂମିକା ଗ୍ରହଣ କରିବ ବୋଲି ଆଶା କରାଯାଉଛି । ପଶ୍ଚିମବଙ୍ଗରେ ବିଜେପି ଇତିହାସ ରଚିଛି, 207 ଆସନ ଜିତିଛି ଏବଂ 294 ସଦସ୍ୟ ବିଶିଷ୍ଟ ବିଧାନସଭାରେ ଏକ ବଡ଼ ସଂଖ୍ୟାଗରିଷ୍ଠତା ହାସଲ କରିଛି । ଏହି ବିଜୟ ରାଜ୍ୟରେ ତୃଣମୂଳ କଂଗ୍ରେସର 15 ବର୍ଷର ପ୍ରଭାବଶାଳୀ ଶାସନର ଅନ୍ତ ଘଟାଇଛି।