ବେଜିଂ,୨୭।୬: ସାଂଘାଇ ସହଯୋଗ ସଂଗଠନ (SCO)ର ବୈଠକ ସମୟରେ, ଭାରତର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ କ୍ୱିଂଡାଓରେ ଚାଇନାର ପ୍ରତିରକ୍ଷା ମନ୍ତ୍ରୀ ଡଙ୍ଗ ଜୁନଙ୍କୁ ଭେଟିଥିଲେ। ଏହି ବୈଠକରେ ରାଜନାଥ ସିଂହ ଚୀନକୁ ସ୍ପଷ୍ଟ ବାର୍ତ୍ତା ଦେଇଥିଲେ ଯେ ଉଭୟ ଦେଶ କୌଣସି ନୂତନ ଉତ୍ତେଜନାକୁ ଏଡାଇବା ଉଚିତ ଏବଂ ସୀମାରେ ଶାନ୍ତି ବଜାୟ ରଖିବା ଆବଶ୍ୟକ।
ବୈଠକ ସମୟରେ, କୈଳାସ ମାନସରୋବର ଯାତ୍ରା ସମ୍ପର୍କରେ ମଧ୍ୟ ଦୁଇ ଦେଶ ମଧ୍ୟରେ ଆଲୋଚନା ହୋଇଥିଲା। ଏହି ଯାତ୍ରା ଗତ ଛଅ ବର୍ଷ ଧରି ସ୍ଥଗିତ ଥିଲା। ରାଜନାଥ ସିଂହ ତାଙ୍କ ପୋଷ୍ଟରେ କହିଛନ୍ତି, ଏବେ ଏହି ଯାତ୍ରା ପୁଣି ଥରେ ଆରମ୍ଭ ହେବାକୁ ଯାଉଛି।
ସୂଚନାଯୋଗ୍ୟ ଯେ, କୋଭିଡ-୧୯ ମହାମାରୀ ଯୋଗୁ ଏହି ଯାତ୍ରା ପ୍ରଥମେ ୨୦୨୦ ରେ ବନ୍ଦ କରାଯାଇଥିଲା, କିନ୍ତୁ ତା’ପରେ ଲଦାଖର ଗାଲଭାନ ଉପତ୍ୟକାରେ ଭାରତ-ଚାଇନା ସାମରିକ ମୁହାଁମୁହିଁ ଯୋଗୁ ଯାତ୍ରା ପୁନଃଆରମ୍ଭ ହୋଇପାରି ନ ଥିଲା। ରାଜନାଥଙ୍କ ଏହି ବାର୍ତ୍ତା ଏପରି ଏକ ସମୟରେ ଆସିଛି ଯେତେବେଳେ ଭାରତ ଏବଂ ଚାଇନା ମଧ୍ୟରେ ସୀମା ବିବାଦ ଏପର୍ଯ୍ୟନ୍ତ ସମ୍ପୂର୍ଣ୍ଣ ସମାଧାନ ହୋଇନାହିଁ। ତାଙ୍କ ସାକ୍ଷାତକୁ ଦୁଇ ଦେଶ ମଧ୍ୟରେ ଆଲୋଚନା ଏବଂ ଶାନ୍ତି ପୁନରୁଦ୍ଧାର ପାଇଁ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଭାବରେ ବିବେଚନା କରାଯାଉଛି।
ରାଜନାଥ ତାଙ୍କ ଚାଇନା ପ୍ରତିପକ୍ଷଙ୍କୁ ବିହାରର ଏକ ମଧୁବଣୀ ଚିତ୍ର ମଧ୍ୟ ପ୍ରଦାନ କରିଥିଲେ। ଏହି ପାରମ୍ପରିକ କଳା ଶୈଳୀ, ଯାହାକୁ ମିଥିଳା ଚିତ୍ରକଳା ମଧ୍ୟ କୁହାଯାଏ, ବିହାରର ମିଥିଳା ଅଞ୍ଚଳ ସହିତ ଜଡିତ। ଏହି କଳାର ବିଶେଷତ୍ୱ ହେଉଛି ସୂକ୍ଷ୍ମ ଚିତ୍ର, ଉଜ୍ଜ୍ୱଳ ରଙ୍ଗ, ସୁନ୍ଦର ଢାଞ୍ଚା ଏବଂ ଆଦିବାସୀ ବ୍ୟକ୍ତିତ୍ୱ। ମଧୁବଣୀ ଚିତ୍ରକଳା ଏହାର ସ୍ପନ୍ଦନଶୀଳ ମାଟିର ରଙ୍ଗ ଏବଂ ସ୍ବତନ୍ତ୍ର ଡିଜାଇନ ପାଇଁ ପ୍ରସିଦ୍ଧ।
ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଚାଇନା କ୍ୱିଂଡାଓ ସହରରେ ଅନୁଷ୍ଠିତ ସାଂଘାଇ ସହଯୋଗ ସଂଗଠନ (SCO)ର ପ୍ରତିରକ୍ଷା ମନ୍ତ୍ରୀମାନଙ୍କ ବୈଠକରେ ଯୋଗଦେବାକୁ ଆସିଛନ୍ତି। ସେ SCO ଦ୍ୱାରା ପ୍ରସ୍ତୁତ ଘୋଷଣାପତ୍ରରେ ସ୍ବାକ୍ଷର କରିବାକୁ ମନା କରିଦେଇଥିଲେ। ସୂତ୍ର ଅନୁସାରେ, ଡକ୍ୟୁମେଣ୍ଟରେ ଆତଙ୍କବାଦ ଭଳି ଏକ ଗମ୍ଭୀର ପ୍ରସଙ୍ଗକୁ ଦୁର୍ବଳ ଦର୍ଶାଯାଇଥିଲା, ଯାହା ଭାରତର କଠୋର ମନୋଭାବକୁ କ୍ଷତି ପହଞ୍ଚାଇପାରେ। ସେଥିପାଇଁ ରାଜନାଥ ସିଂହ ସେହି ଦଲିଲରେ ସ୍ବାକ୍ଷର କରି ନ ଥିଲେ।
SCO ବୈଠକ ସମୟରେ ତାଙ୍କ ଭାଷଣରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ପାକିସ୍ତାନର ନାଁ ନ ନେଇ କଟାକ୍ଷ କରିଥିଲେ। ସେ କହିଛନ୍ତି,ଯ ଯେଉଁ ଦେଶ ଆତଙ୍କବାଦକୁ ପ୍ରୋତ୍ସାହିତ କରନ୍ତି ଏବଂ ଏହାକୁ ନିଜ ଲୋଭୀ ଉଦ୍ଦେଶ୍ୟ ପାଇଁ ବ୍ୟବହାର କରନ୍ତି ସେମାନଙ୍କୁ ଗମ୍ଭୀର ପରିଣାମ ଭୋଗିବାକୁ ପଡିବ। କିଛି ଦେଶ ସୀମାପାର ଆତଙ୍କବାଦକୁ ନୀତିଗତ ଅସ୍ତ୍ର ଭାବରେ ବ୍ୟବହାର କରନ୍ତି ଏବଂ ଆତଙ୍କବାଦୀଙ୍କୁ ଆଶ୍ରୟ ଦିଅନ୍ତି। ରାଜନାଥ ସିଂହ ଗୁରୁତ୍ୱାରୋପ କରିଥିଲେ ଯେ ଏପରି ଦ୍ୱୈତ ମାନଦଣ୍ଡ ଆଉ ଜାରି ରହିପାରିବ ନାହିଁ ଏବଂ SCO ଏପରି ଦେଶଗୁଡ଼ିକୁ ସମାଲୋଚନା କରିବାକୁ ପଛଘୁଞ୍ଚା ଦେବା ଉଚିତ୍ ନୁହେଁ।