ନୂଆଦିଲ୍ଲୀ: ରାଷ୍ଟ୍ରପତି ଦ୍ରୌପଦୀ ମୁର୍ମୁ ୭୭ ତମ ସ୍ୱାଧୀନତା ଦିବସର ପୂର୍ବ ସନ୍ଧ୍ୟାରେ ଦେଶବାସୀଙ୍କୁ ସମ୍ବୋଧିତ କରି କହିଛନ୍ତି ଯେ ସେ ଚାହୁଁଛନ୍ତି ଯେ ଭାରତର ଝିଅମାନେ “ଆଗକୁ ଅଗ୍ରସର ହୁଅନ୍ତୁ” ଏବଂ “ସମସ୍ତ ଆହ୍ୱାନକୁ ସାମ୍ନା କରିବାରେ ସକ୍ଷମ ହୁଅନ୍ତୁ”। ସେ ସମ୍ବିଧାନ ଦ୍ୱାରା ପ୍ରଦତ୍ତ ସମାନତାର ଅଧିକାର ଉପରେ ମଧ୍ୟ ଗୁରୁତ୍ୱାରୋପ କରି କହିଛନ୍ତି, “ପ୍ରତ୍ୟେକ ଭାରତୀୟ ସମାନ ନାଗରିକ, ପ୍ରତ୍ୟେକଙ୍କୁ ଏହି ମାଟିରେ ସମାନ ସୁଯୋଗ, ଅଧିକାର ଏବଂ କର୍ତ୍ତବ୍ୟ ରହିଛି”। ଭାରତୀୟ ନାଗରିକ ଭାବେ ସେମାନଙ୍କ ପରିଚୟ ଜାତି, ବର୍ଣ୍ଣ ଏବଂ ଭାଷାର ଅନ୍ୟ ସମସ୍ତ ପରିଚୟକୁ ଅତିକ୍ରମ କରେ ବୋଲି ସେ ଭାରତର ରାଷ୍ଟ୍ରପତି ଭାବେ ତାଙ୍କର ଦ୍ୱିତୀୟ ଅଭିଭାଷଣରେ କହିଛନ୍ତି।
ରାଷ୍ଟ୍ରପତି ମୁର୍ମୁ କହିଛନ୍ତି ଯେ ଭାରତର ବିକାଶ ପାଇଁ ମହିଳାମାନେ ଏବେ ପ୍ରତ୍ୟେକ କ୍ଷେତ୍ରରେ ଭାଗ ନେଉଛନ୍ତି। ଆଜି ମହିଳାମାନେ ଦେଶର ବିକାଶ ଏବଂ ସେବାରେ ପ୍ରତ୍ୟେକ କ୍ଷେତ୍ରରେ ବ୍ୟାପକ ଯୋଗଦାନ କରୁଛନ୍ତି ଏବଂ ରାଷ୍ଟ୍ରର ଗୌରବକୁ ବୃଦ୍ଧି କରୁଛନ୍ତି। ଆଜି ଆମ ମହିଳାମାନେ ଏଭଳି ଅନେକ କ୍ଷେତ୍ରରେ ନିଜର ସ୍ୱତନ୍ତ୍ର ସ୍ଥାନ ସୃଷ୍ଟି କରିପାରିଛନ୍ତି, ଯେଉଁଥିରେ କିଛି ଦଶନ୍ଧି ପୂର୍ବରୁ ସେମାନଙ୍କ ଅଂଶଗ୍ରହଣ କଳ୍ପନାତୀତ ଥିଲା ବୋଲି ସେ କହିଛନ୍ତି।
ମୁଁ ଖୁସି ଯେ ଆମ ଦେଶରେ ମହିଳାମାନଙ୍କ ଆର୍ଥିକ ସଶକ୍ତିକରଣ ଉପରେ ବିଶେଷ ଧ୍ୟାନ ଦିଆୟାଉଛି। ଆର୍ଥିକ ସଶକ୍ତିକରଣ ଦ୍ୱାରା ପରିବାର ଓ ସମାଜରେ ମହିଳାଙ୍କ ସ୍ଥିତି ମଜଭୁତ ହୋଇଥାଏ ବୋଲି ରାଷ୍ଟ୍ରପତି କହିଛନ୍ତି।
ସରୋଜିନୀ ନାଇଡୁ, ଅମ୍ମୁ ସ୍ୱାମୀନାଥନ୍, ରମା ଦେବୀ, ଅରୁଣା ଆସଫ-ଆଲି, ସୁଚେତା କୃପଲାନୀଙ୍କ ଭଳି ନେତାଙ୍କ ଉଦାହରଣ ଦେଇ ସେ କହିଛନ୍ତି, ମୁଁ ଚାହୁଁଛି ଦେଶର ଝିଅମାନେ ଆଗକୁ ବଢ଼ନ୍ତୁ। ମା’ କସ୍ତୁରବା ଜାତିର ପିତା ମହାତ୍ମା ଗାନ୍ଧୀଙ୍କୁ ସତ୍ୟାଗ୍ରହର କଠିନ ରାସ୍ତାରେ ପ୍ରତିଟି ପଦକ୍ଷେପରେ ସମକକ୍ଷ କରିଥିଲେ ବୋଲି ସେ କହିଛନ୍ତି।
ରାଷ୍ଟ୍ରପତି ମୁର୍ମୁ କହିଛନ୍ତି ଯେ ଭାରତ କେବଳ ବିଶ୍ୱ ଦରବାରରେ ନିଜର “ଉଚିତ ସ୍ଥାନ” ଫେରି ପାଇନାହିଁ, ବରଂ ବିଶ୍ୱ ଶୃଙ୍ଖଳାରେ ନିଜର ସ୍ଥିତିକୁ ମଧ୍ୟ ବଢ଼ାଇଛି। ପ୍ରବାସୀ ଭାରତୀୟଙ୍କ ଦ୍ୱାରା ଭାରତ କାହାଣୀ ଉପରେ ଯେଉଁ ନୂତନ ଆତ୍ମବିଶ୍ୱାସ ପ୍ରକାଶ ପାଇଛି ତାହାରୁ ଏହା ସ୍ପଷ୍ଟ ହୋଇଛି।
ବିଶ୍ୱବ୍ୟାପୀ ବିକାଶମୂଳକ ଏବଂ ମାନବୀୟ ଲକ୍ଷ୍ୟକୁ ପ୍ରୋତ୍ସାହିତ କରିବାରେ ଭାରତ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ରାଷ୍ଟ୍ରପତି କହିଛନ୍ତି ଯେ ଏହା ମଧ୍ୟ ଅନ୍ତର୍ଜାତୀୟ ଫୋରମଗୁଡିକର ନେତୃତ୍ୱ ଗ୍ରହଣ କରିଛି, ବିଶେଷ କରି ଜି-୨୦ର ସଭାପତିତ୍ୱ ଗ୍ରହଣ କରିଛି।
ସେ କହିଛନ୍ତି ଯେ ଏପରି ଅନେକ ବିଶ୍ୱସ୍ତରୀୟ ପ୍ରସଙ୍ଗ ରହିଛି ଯାହା ସମଗ୍ର ମାନବତାକୁ ଚିନ୍ତାରେ ପକାଇଛି ଏବଂ ଭୌଗଳିକ ସୀମା ମଧ୍ୟରେ ସୀମିତ ନୁହେଁ। ମୁଁ ନିଶ୍ଚିତ ଯେ ବୈଶ୍ୱିକ ପ୍ରସଙ୍ଗଗୁଡ଼ିକର ମୁକାବିଲା କରିବାରେ ଭାରତର ପ୍ରମାଣିତ ନେତୃତ୍ୱ ସହିତ ସଦସ୍ୟ ରାଷ୍ଟ୍ରମାନେ ଏହି ଦିଗରେ ପ୍ରଭାବୀ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ସକ୍ଷମ ହେବେ ବୋଲି ରାଷ୍ଟ୍ରପତି କହିଛନ୍ତି।