ନୂଆଦିଲ୍ଲୀ: ଆମେରିକା ଏବଂ ଇସ୍ରାଏଲ ସହ ଜାରି ରହିଥିବା ଉତ୍ତେଜନା ଓ ଯୁଦ୍ଧ ପରିସ୍ଥିତି ମଧ୍ୟରେ ଇରାନ ଭାରତକୁ ଏକ ଗୁରୁତ୍ୱପୂର୍ଣ୍ଣ କୂଟନୈତିକ ପ୍ରସ୍ତାବ ଦେଇଛି। ତେହେରାନରୁ ନୂଆଦିଲ୍ଲୀ ମଧ୍ୟରେ ସିଧାସଳଖ ବିମାନ ସେବା ଆରମ୍ଭ କରିବା ପାଇଁ ଇରାନ ସରକାର ଭାରତ ଆଗରେ ନୂଆ ଯୋଜନା ରଖିଛନ୍ତି।
ଅନ୍ତର୍ଜାତୀୟ ପ୍ରତିବନ୍ଧକ ଏବଂ ଆକାଶମାର୍ଗ କଟକଣା ସତ୍ତ୍ୱେ, ନିଜର ଆଞ୍ଚଳିକ ଏବଂ ଆର୍ଥିକ ସମ୍ପର୍କକୁ ସୁଦୃଢ଼ କରିବା ପାଇଁ ଇରାନ ଭାରତ ସହ ଏହି ନୂତନ ଏୟାର-ଲିଙ୍କ ସ୍ଥାପନ କରିବାକୁ ଚାହୁଁଛି। ଦ୍ୱିପାକ୍ଷିକ ବାଣିଜ୍ୟ, ଯାତ୍ରୀ ପରିବହନ ଏବଂ କୂଟନୈତିକ ସମ୍ପର୍କକୁ ସକ୍ରିୟ ରଖିବା ଏହି ପ୍ରସ୍ତାବର ମୁଖ୍ୟ ଲକ୍ଷ୍ୟ।
ପଶ୍ଚିମ ଏସିଆରେ ସୃଷ୍ଟି ହୋଇଥିବା ଅସ୍ଥିରତା ମଧ୍ୟରେ ଅନେକ ଦେଶ ନିଜର ବିମାନ ସେବା ବାତିଲ କରିଥିବା ବେଳେ ଇରାନର ଏହି ପ୍ରସ୍ତାବକୁ ବେଶ୍ ଗୁରୁତ୍ୱପୂର୍ଣ୍ଣ ମନେକରାଯାଉଛି। ବିଶେଷ କରି ଇରାନରେ ରହୁଥିବା ଭାରତୀୟ ନାଗରିକ, ବ୍ୟବସାୟୀ ଓ ଛାତ୍ରଛାତ୍ରୀଙ୍କ ପାଇଁ ଏହି ସିଧାସଳଖ ବିମାନ ଯୋଗାଯୋଗ ଏକ ବଡ଼ ଆଶ୍ୱାସନା ହୋଇପାରେ।
ତେବେ ମଧ୍ୟପ୍ରାଚ୍ୟର ବର୍ତ୍ତମାନର ସୁରକ୍ଷା ପରିସ୍ଥିତି ଏବଂ ଆକାଶମାର୍ଗର ସୁରକ୍ଷାକୁ ଦୃଷ୍ଟିରେ ରଖି ଭାରତର ବୈଦେଶିକ ମନ୍ତ୍ରାଳୟ ଓ ବେସାମରିକ ବିମାନ ଚଳାଚଳ ମନ୍ତ୍ରାଳୟ ଏହି ପ୍ରସ୍ତାବର ସମୀକ୍ଷା କରୁଛନ୍ତି। ଆମେରିକାର ପ୍ରତିବନ୍ଧକ ଓ ସୁରକ୍ଷା ସମ୍ବନ୍ଧୀୟ ଦିଗଗୁଡ଼ିକୁ ଅନୁଧ୍ୟାନ କରିବା ପରେ ଭାରତ ସରକାର ଏହାଉପରେ ଅନ୍ତିମ ନିଷ୍ପତ୍ତି ନେବେ।