ଭୁବନେଶ୍ୱର: ଓଡ଼ିଶାରେ ପରମାଣୁ ଶକ୍ତି ଉତ୍ପାଦନକୁ ନେଇ ବଡ଼ ଖବର। ରାଜ୍ୟରେ ନ୍ୟୁକ୍ଲିୟର ପାୱାର ପ୍ଲାଣ୍ଟ ସ୍ଥାପନ ପାଇଁ ଦେଶର ଦୁଇ ବଡ଼ ଶିଳ୍ପ ଗୋଷ୍ଠୀ ଟାଟା ଗ୍ରୁପ୍ ଓ ଆଦାନୀ ଗ୍ରୁପ୍ ଓଡ଼ିଶା ସରକାରଙ୍କ ନିକଟରେ ଅଲଗା ଅଲଗା ପ୍ରସ୍ତାବ ଦେଇଛନ୍ତି। ତେବେ ଏହି ପ୍ରସ୍ତାବ ଉପରେ ସରକାର ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ନିଷ୍ପତ୍ତି ନେଇନାହାନ୍ତି।
ରାଜ୍ୟ ଶକ୍ତି ବିଭାଗର ସଚିବ ବିଶାଳ କୁମାର ଦେବ ଏହି ଦୁଇ ପ୍ରସ୍ତାବ ଆସିଥିବା ସ୍ପଷ୍ଟ କରିଛନ୍ତି। ଓଡ଼ିଶାକୁ ଦେଶର ଏକ ବଡ଼ ଏନର୍ଜି ହବ୍ରେ ପରିଣତ କରିବା ପାଇଁ ସରକାରଙ୍କ ଦୀର୍ଘମିଆଦୀ ଭିଜନ୍ ୨୦୩୬ ଓ ଭିଜନ୍ ୨୦୪୭ ଯୋଜନା ମଧ୍ୟରେ ଏହି ପ୍ରସ୍ତାବଗୁଡ଼ିକୁ ନେଇ ମୂଲ୍ୟାଙ୍କନ ଚାଲିଛି।
ଟାଟା ଗ୍ରୁପ୍ ଓଡ଼ିଶାର ମାଲକାନଗିରି ଜିଲ୍ଲାରେ ୪ଟି ପରମାଣୁ ଶକ୍ତି ୟୁନିଟ୍ ସ୍ଥାପନ ପାଇଁ ପ୍ରସ୍ତାବ ଦେଇଛି। ପ୍ରତ୍ୟେକ ୟୁନିଟ୍ର କ୍ଷମତା ୨୦୦ ମେଗାୱାଟ୍ ରହିବ। ଅର୍ଥାତ୍ ଟାଟାର ପ୍ରସ୍ତାବିତ ପ୍ରକଳ୍ପର ମୋଟ କ୍ଷମତା ୮୦୦ ମେଗାୱାଟ୍ ହେବ। ତେବେ ଏହି ପ୍ରକଳ୍ପ ପାଇଁ ଟାଟା ଗ୍ରୁପ୍ କେତେ ଟଙ୍କା ନିବେଶ କରିବ, ସେନେଇ କମ୍ପାନୀ ପକ୍ଷରୁ କୌଣସି ଆର୍ଥିକ ଆକଳନ ପ୍ରକାଶ କରାଯାଇନାହିଁ।
ଅନ୍ୟପଟେ ଆଦାନୀ ଗ୍ରୁପ୍ର ପ୍ରସ୍ତାବ ଆହୁରି ବଡ଼। ଜୁଲାଇ ୩୦ରେ ଆଦାନୀ ଗ୍ରୁପ୍ର ଏକ ପ୍ରତିନିଧି ଦଳ ଓଡ଼ିଶାର ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କୁ ଭେଟିଥିଲେ। କମ୍ପାନୀ ରାଜ୍ୟର କ୍ଲିନ୍ ଏନର୍ଜି କ୍ଷେତ୍ରରେ ପ୍ରାୟ ୧.୫ ଲକ୍ଷ କୋଟି ଟଙ୍କା ନିବେଶ କରିବାର ଯୋଜନା ରଖିଛି। ଆଦାନୀର ପ୍ରସ୍ତାବରେ ରହିଛି, ୬,୦୦୦ ମେଗାୱାଟ୍ କ୍ଷମତାର ଦୁଇଟି ପରମାଣୁ ବିଦ୍ୟୁତ୍ ପ୍ଲାଣ୍ଟ, ୨,୪୦୦ ମେଗାୱାଟ୍ର ଅଲ୍ଟ୍ରା-ସୁପରକ୍ରିଟିକାଲ୍ ଥର୍ମାଲ୍ ପାୱାର ପ୍ଲାଣ୍ଟ, ଫ୍ଲୋଟିଂ ସୋଲାର ପ୍ରକଳ୍ପ ଏବଂ ପମ୍ପଡ୍ ଷ୍ଟୋରେଜ୍ ପ୍ରକଳ୍ପ । ଅର୍ଥାତ୍ ଆଦାନୀ ଗ୍ରୁପ୍ ଓଡ଼ିଶାରେ ପରମାଣୁ ଶକ୍ତି ସହିତ ଥର୍ମାଲ୍, ସୋଲାର ଓ ଏନର୍ଜି ଷ୍ଟୋରେଜ୍କୁ ମିଶାଇ ଏକ ବଡ଼ କ୍ଲିନ୍ ଏନର୍ଜି ନେଟୱର୍କ ଗଢ଼ିବାର ପ୍ରସ୍ତାବ ଦେଇଛି।