କଟକ: ଲଗାଣ ବର୍ଷା ଯୋଗୁଁ ଉପରମୁଣ୍ଡରୁ ମାଡ଼ି ଆସୁଛି ପାଣି। ହୀରାକୁଦ ଜଳଭଣ୍ଡାରରୁ ଛଡ଼ାଯାଇଥିବା ଚଳିତ ବର୍ଷର ପ୍ରଥମ ବନ୍ୟାଜଳ ଶେଷରେ ଆସି ମୁଣ୍ଡଳୀ ବ୍ୟାରେଜରେ ପହଞ୍ଚିଛି। ଏହାର ପ୍ରଭାବରେ ମହାନଦୀ ଏବଂ ଏହାର ଶାଖା ନଦୀଗୁଡ଼ିକର ଜଳସ୍ତର ଏବେ ଧୀରେ ଧୀରେ ବୃଦ୍ଧି ପାଇବାରେ ଲାଗିଛି। ନଦୀର ଏହି ଫୁଲା ରୂପ ଦେଖି କଟକ, ପୁରୀ, ଜଗତସିଂହପୁର ଏବଂ କେନ୍ଦ୍ରାପଡ଼ା ଆଦି ଉପକୂଳବର୍ତ୍ତୀ ତଥା ତଳିଆ ଅଞ୍ଚଳରେ ରହୁଥିବା ଲୋକଙ୍କ ଛାତିର ସ୍ପନ୍ଦନ ବଢ଼ିଗଲାଣି।
ମହାନଦୀର ଉପରମୁଣ୍ଡ ଓ ଛତିଶଗଡ଼ରେ ପ୍ରବଳ ବର୍ଷା କାରଣରୁ ହୀରାକୁଦ ଡ୍ୟାମ୍ର ଜଳସ୍ତର ବିପଦଜନକ ଭାବେ ବୃଦ୍ଧି ପାଉଥିଲା। ଏହାକୁ ଦୃଷ୍ଟିରେ ରଖି ପ୍ରଶାସନ ନିୟମିତ ବ୍ୟବଧାନରେ ଏକାଧିକ ସୁଇସ୍ ଗେଟ୍ ଖୋଲି ଲକ୍ଷ ଲକ୍ଷ କ୍ୟୁସେକ୍ ବନ୍ୟାଜଳ ତଳମୁଣ୍ଡକୁ ଛାଡିଛି। ହୀରାକୁଦରୁ ବାହାରିଥିବା ଏହି ବିପୁଳ ଜଳରାଶି ମୁଣ୍ଡଳୀରେ ପହଞ୍ଚିବା ପରେ ମହାନଦୀ ଏବେ କୂଳ ଖାଉଛି।
ବର୍ତ୍ତମାନ ମୁଣ୍ଡଳୀରେ ପାଣିର ଫ୍ଲୋ କ୍ରମାଗତ ଭାବେ ବଢ଼ୁଥିବାରୁ ଜଳସମ୍ପଦ ବିଭାଗ ପକ୍ଷରୁ ସେଠାରେ ରିଅଲ୍-ଟାଇମ୍ ମନିଟରିଂ କରାଯାଉଛି। ବନ୍ୟା ଆଶଙ୍କା ଥିବା ଜିଲ୍ଲାଗୁଡ଼ିକର ଜିଲ୍ଲାପାଳଙ୍କୁ ରାଜ୍ୟ ସ୍ୱତନ୍ତ୍ର ରିଲିଫ୍ କମିଶନର ଆଲର୍ଟ ରହିବାକୁ ନିର୍ଦ୍ଦେଶ ଦେଇଛନ୍ତି। ନଦୀବନ୍ଧର ଦୁର୍ବଳ ତଥା ସମ୍ବେଦନଶୀଳ ସ୍ଥାନଗୁଡ଼ିକରେ ରାତିଦିନ ପାଟ୍ରୋଲିଂକୁ କଡ଼ାକଡ଼ି କରାଯାଇଛି। ଆବଶ୍ୟକ ପଡ଼ିଲେ ତଳିଆ ଅଞ୍ଚଳରୁ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିବା ପାଇଁ NDRF ଏବଂ ODRAF ଟିମ୍କୁ ପ୍ରସ୍ତୁତ ରଖାଯାଇଛି।
ଗୋଟିଏ ପଟେ ବନ୍ୟାଜଳ ଆସି ମହାନଦୀ ଫୁଲୁଥିବା ବେଳେ ଅନ୍ୟପଟେ ପାଣିପାଗ ବିଭାଗର ଚେତାବନୀ ଚିନ୍ତାକୁ ଦ୍ୱିଗୁଣିତ କରିଦେଇଛି। ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଏବଂ ଘୂର୍ଣ୍ଣିବଳୟ ଯୋଗୁଁ ଆଗାମୀ ୪୮ ଘଣ୍ଟା ମଧ୍ୟରେ ରାଜ୍ୟର ଅଧିକାଂଶ ସ୍ଥାନରେ ପ୍ରବଳରୁ ଅତି ପ୍ରବଳ ବର୍ଷା ହେବାର ସମ୍ଭାବନା ରହିଛି। ଯଦି ଉପରମୁଣ୍ଡରେ ବର୍ଷା ଜାରି ରହେ, ତେବେ ବାଧ୍ୟ ହୋଇ ଡ୍ୟାମ୍ରୁ ଅଧିକ ଗେଟ୍ ଖୋଲିବାକୁ ପଡ଼ିବ, ଯାହା ମୁଣ୍ଡଳୀରେ ଜଳସ୍ତରକୁ ଆହୁରି ସାଂଘାତିକ ସ୍ଥିତିକୁ ନେଇଯିବ।
ସମ୍ଭାବ୍ୟ ବନ୍ୟା ସ୍ଥିତିକୁ ଦୃଷ୍ଟିରେ ରଖି ଲୋକଙ୍କୁ ଭୟଭୀତ ନହେବାକୁ ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। ନଦୀକୂଳ ଏବଂ ବିପଦଜନକ ସ୍ଥାନକୁ ନଯିବା ପାଇଁ ସ୍ଥାନୀୟ ବାସିନ୍ଦାଙ୍କୁ ବାରଣ କରାଯାଇଛି।