ପଶ୍ଚିମବଙ୍ଗରେ ହିଂସା : ୨ ବିଜେପି ଓ ଜଣେ ଟିଏମସି କର୍ମୀଙ୍କ ମୃତ୍ୟୁ, ଅନେକ ସ୍ଥାନରେ ଭଙ୍ଗାରୁଜା

କୋଲକାତା: ନିର୍ବାଚନ ଫଳାଫଳ ଘୋଷଣା ହେବା ପରଠାରୁ ରାଜ୍ୟର ପରିସ୍ଥିତି ଉତ୍ତେଜନାପୂର୍ଣ୍ଣ ରହିଛି। ସୋମବାରଠାରୁ ରାଜ୍ୟରେ ଲଗାତାର ଭଙ୍ଗାରୁଜା ଏବଂ ହିଂସା ଘଟଣା ରିପୋର୍ଟ ହେଉଛି। ସାଧାରଣ ଲୋକେ ଆତଙ୍କିତ ଅବସ୍ଥାରେ ରହିଛନ୍ତି। ଘରୁ ବାହାରକୁ ଯିବାକୁ ଭୟ କରୁଛନ୍ତି। ପ୍ରଶାସନ ପକ୍ଷରୁ ଲୋକଙ୍କୁ ଘରେ ରହିବାକୁ ଅନୁରୋଧ କରାଯାଇଛି।

ନିର୍ବାଚନ ଫଳାଫଳ ପରେ ଘଟିଥିବା ହିଂସାରେ ମଙ୍ଗଳବାର ପୃଥକ ପୃଥକ ଘଟଣାରେ ଦୁଇ ଜଣ ବିଜେପି ଏବଂ ଜଣେ ତୃଣମୂଳ କଂଗ୍ରେସ କର୍ମୀଙ୍କ ମୃତ୍ୟୁ ଘଟିଛି। ଟିଏମସି ସମର୍ଥକଙ୍କ ମାଡ଼ରେ ନ୍ୟୁ ଟାଉନ୍ ଅଞ୍ଚଳରେ ବିଜେପି କର୍ମୀ ମଧୁ ମଣ୍ଡଳଙ୍କ ମୃତ୍ୟୁ ଘଟିଛି। ବିଜେପିର ବିଜୟ ଶୋଭାଯାତ୍ରା ସମୟରେ ଯୁକ୍ତିତର୍କ ପରେ ତାଙ୍କ ଉପରେ ଆକ୍ରମଣ ହୋଇଥିବା ପୁଲିସ କହିଛି। ତାଙ୍କୁ ଚିକିତ୍ସା ଲାଗି ଡାକ୍ତରଖାନା ନିଆଯାଇଥିଲା। ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ଘଟଣା ପରେ ବିଜେପି ସମର୍ଥକମାନେ ଅଞ୍ଚଳର ଟିଏମସି କର୍ମୀଙ୍କ ଘର ଉପରେ ଆକ୍ରମଣ କରିବା ସହ ରାସ୍ତା ଅବରୋଧ କରିଥିଲେ। ପରିସ୍ଥିତି ନିୟନ୍ତ୍ରଣ ପାଇଁ କେନ୍ଦ୍ରୀୟ ବାହିନୀକୁ ମୁତୟନ କରାଯାଇଛି। ବୀରଭୂମି ଜିଲ୍ଲାର ନାନୁରରେ ବିଜେପି କର୍ମୀମାନେ ଟିଏମସି କର୍ମୀ ଆବିର ଶେଖଙ୍କୁ ହତ୍ୟା କରିଥିବା ଅଭିଯୋଗ ହୋଇଛି। ପୁଲିସର ସୂଚନା ଅନୁଯାୟୀ, ସନ୍ତୋଷପୁର ଗାଁରେ ଏକ ଘଟଣାରେ ତାଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରାଯାଇଥିଲା, ଯାହା ଫଳରେ ତାଙ୍କର ଘଟଣାସ୍ଥଳରେ ମୃତ୍ୟୁ ହୋଇଥିଲା। ଏହିଘଟଣାରେ ଅନ୍ୟ ଜଣେ ଆହତ ହୋଇଥିଲେ। ନାନୁରର ଟିଏମସି ବିଧାୟକ ବିଧାନ ମାଝୀ ଅଭିଯୋଗ କରିଛନ୍ତି, ବିଜେପି ଗୁଣ୍ଡାମାନେ ଏହି ହତ୍ୟାକାଣ୍ଡ ଘଟାଇଛନ୍ତି।

ଅପରପକ୍ଷରେ ବିଜେପି ନେତା ଶ୍ୟାମାପଦ ମଣ୍ଡଳ ଅଭିଯୋଗକୁ ଖଣ୍ଡନ କରି ନିରପେକ୍ଷ ତଦନ୍ତ ଦାବି କରିଛନ୍ତି। ହାୱଡାର ଉଦୟ ନାରାୟଣପୁରରେ ବିଜେପି କର୍ମୀ ଯାଦବ ବାରଙ୍କୁ ହତ୍ୟା କରାଯାଇଛି। ତାଙ୍କ ପତ୍ନୀ ଅଭିଯୋଗ କରିଛନ୍ତି ଯେ, ଜୟ ଶ୍ରୀରାମ ସ୍ଳୋଗାନ ଦେଇ ବିଜୟ ଖୁସିରେ ଅବିର ବୋଳିବା ଯୋଗୁଁ ତାଙ୍କ ଉପରେ ଆକ୍ରମଣ କରାଯାଇଥିଲା। ରାଜ୍ୟର ଅନେକ ସ୍ଥାନରେ ଭଙ୍ଗାରୁଜା ଏବଂ ହିଂସା ଘଟଣା ଘଟିଛି। ଟଲିଗଞ୍ଜର ବିଜୟଗଡ଼-ନେତାଜୀ ନଗର ଅଞ୍ଚଳରେ ପୂର୍ବତନ ମନ୍ତ୍ରୀ ଅରୂପ ବିଶ୍ୱାସଙ୍କ ନିର୍ବାଚନ କାର୍ଯ୍ୟାଳୟରେ ଉତ୍ତେଜିତ ଲୋକେ ଭଙ୍ଗାରୁଜା କରିଛନ୍ତି। ସହରର ରୁବି କ୍ରସିଂରେ ଥିବା ଜଣେ ଟିଏମସି କାଉନସିଲରଙ୍କ କାର୍ଯ୍ୟାଳୟ ଉପରେ ମଧ୍ୟ ଆକ୍ରମଣ କରାଯାଇଛି। ଏହା ବ୍ୟତୀତ, ହାୱଡା, ଉତ୍ତର ୨୪ ପରଗଣା ଏବଂ ମୁର୍ଶିଦାବାଦ ସମେତ ଅନେକ ଜିଲ୍ଲାରେ ଦଳୀୟ କାର୍ଯ୍ୟାଳୟରେ ପୋଡ଼ାଜଳା ଏବଂ ଆକ୍ରମଣ ହୋଇଥିବା ରିପୋର୍ଟ କରାଯାଇଛି।