କଟକ: ଶିଶୁ ଅଧିକାରର ସୁରକ୍ଷା ଓ ସେମାନଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ଲକ୍ଷ୍ୟରେ କଟକରେ ଏକ ସ୍ୱତନ୍ତ୍ର ଆଧାର ପଞ୍ଜିକରଣ ଶିବିର ଅନୁଷ୍ଠିତ ହୋଇଯାଇଛି। ନ୍ୟାସନାଲ ଲ’ ୟୁନିଭର୍ସିଟି ଓଡ଼ିଶା (NLUO), କଟକ ମହାନଗର ନିଗମ (CMC) ଏବଂ ଜିଲ୍ଲା ଶିଶୁ ସୁରକ୍ଷା ୟୁନିଟ୍ର ମିଳିତ ସହଯୋଗରେ ଏହି କାର୍ଯ୍ୟକ୍ରମ ଆୟୋଜନ କରାଯାଇଛି।
ସିଡିଏ ସେକ୍ଟର-୧୧ ସ୍ଥିତ ଗୋଷ୍ଠୀ କେନ୍ଦ୍ରଠାରେ ଆୟୋଜିତ ଏହି ଶିବିରରେ କଟକର ୩ ନମ୍ବର ୱାର୍ଡ ଅନ୍ତର୍ଗତ ବାଲ୍ଲକି ନଗର, ଭୁକିତିରାୟପୁର ଏବଂ ବାବା ତିଳକାନଗର ସହରାଞ୍ଚଳ ବସ୍ତିର ପ୍ରାୟ ୫୦ରୁ ଅଧିକ ଶିଶୁଙ୍କର ଆଧାର ପଞ୍ଜିକରଣ କରାଯାଇଛି। ‘ପ୍ରୋଜେକ୍ଟ କୁଟୁମ୍ବ’ ମାଧ୍ୟମରେ ଏହି ପିଲାମାନଙ୍କୁ ସରକାରୀ ସେବା ସହ ଯୋଡ଼ିବା ପାଇଁ ଏହା ଏକ ପ୍ରୟାସ।
ଏହି ଶିବିରକୁ କଟକ ମ୍ୟୁନିସିପାଲ କର୍ପୋରେସନ କମିଶନର ନିଖିଲ ପବନ କଲ୍ୟାଣ ମୁଖ୍ୟ ଅତିଥି ଭାବେ ଯୋଗଦେଇ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ NLUO କୁଳପତି ପ୍ରଫେସର ବେଦ କୁମାରୀ, ଶିଶୁ ଅଧିକାର କେନ୍ଦ୍ର (CCR) ନିର୍ଦ୍ଦେଶକ ପ୍ରଫେସର ବିରାଜ ସ୍ୱାଇଁ, ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଅଭିଜିତା ରାଉତ ଏବଂ ୱାର୍ଡ କର୍ପୋରେଟର ପ୍ରଦୀପ ରାଉତ ପ୍ରମୁଖ ଉପସ୍ଥିତ ଥିଲେ।
୨୦୨୨ ଅଗଷ୍ଟ ମାସରୁ ଆରମ୍ଭ ହୋଇଥିବା ଏହି ପ୍ରୋଜେକ୍ଟର ମୁଖ୍ୟ ଲକ୍ଷ୍ୟ ହେଉଛି ସହରାଞ୍ଚଳ ବସ୍ତିରେ ରହୁଥିବା ଶିଶୁମାନଙ୍କୁ ନାଗରିକତା ଓ ସାମାଜିକ ଅଧିକାର ପ୍ରଦାନ କରିବା। ଏହା ନୀତି ଆୟୋଗଙ୍କ ନିର୍ଦ୍ଦେଶ ଅନୁଯାୟୀ କାର୍ଯ୍ୟ କରୁଛି। ଶିଶୁମାନଙ୍କୁ ଉପଯୁକ୍ତ ସମ୍ମାନ ଓ ସମାନ ସୁଯୋଗ ଦେବା ପାଇଁ NLUO ର ଶିଶୁ ଅଧିକାର କେନ୍ଦ୍ର (CCR) ନିରନ୍ତର କାର୍ଯ୍ୟ କରୁଛି।
ଏହି ଅବସରରେ ଅତିରିକ୍ତ ଜିଲ୍ଲା ଶିକ୍ଷା ଅଧିକାରୀ ଅଭିଜିତା ରାଉତ ଆଧାର ପଞ୍ଜିକରଣ ସମୟରେ ସଠିକ୍ ସୂଚନା ଏବଂ ବିଶେଷ କରି ମୋବାଇଲ୍ ନମ୍ବର ପ୍ରଦାନ କରିବା ବେଳେ ସତର୍କ ରହିବାକୁ ଅଭିଭାବକମାନଙ୍କୁ ପରାମର୍ଶ ଦେଇଥିଲେ। ସେହିପରି କୁଳପତି ପ୍ରଫେସର ବେଦ କୁମାରୀ ପିଲାମାନଙ୍କୁ ଭବିଷ୍ୟତରେ ଉଚ୍ଚଶିକ୍ଷା ପାଇଁ ଉତ୍ସାହିତ କରିଥିଲେ।
ସୂଚନାଯୋଗ୍ୟ ଯେ, ଏହି ଆଧାର ପଞ୍ଜିକରଣ ଶିବିର ଆଗାମୀ ୨୨ ଫେବୃଆରୀ ପର୍ଯ୍ୟନ୍ତ ଚାଲିବ। ଏହି କାର୍ଯ୍ୟକ୍ରମକୁ ‘ପ୍ରୋଜେକ୍ଟ କୁଟୁମ୍ବ’ର ସଂଯୋଜକ ଡକ୍ଟର ସ୍ୱାଗତିକା ସାମଲ ଓ ସ୍ୱେଚ୍ଛାସେବୀମାନେ ପରିଚାଳନା କରୁଛନ୍ତି।